Lideri i opozitës VMRO-DPMNE, Hristijan Mickovski ka thënë se ka marrë informacione se po planifikohet ridefinimi i shtetit në kuadër të Komisionit për ndryshime kushtetuese, përcjell KDP.
Ai sot nga Kavadari i ka bërë apel kryeministrit Dimitar Kovaçevski “të ketë kujdes” në lidhje me “koncesionin e tij tek lojtari kryesor në qeveri, që është BDI”. Sipas tij, ai koncesion është i madh, është financiar. Lideri i VMRO-DPMNE-së thotë se është i vetëdijshëm se temë e diskutimit të Grupit punues për ndryshime kushtetuese nuk është vetëm përfshirja e pakicës bullgare në preambulë, por, siç thotë ai, ripërcaktimi i plotë i Maqedonisë si shteti.
“Duhet të jetë binacionale në të cilën do të jenë dy popuj, disa bashkësi etnike që tani janë pjesë e popullit në kuadër të Preambulës dhe çdo gjë tjetër mbi një përqindje të caktuar që lidhet me regjistrimin duhet të jetë pakicë. Ka mbetur vetëm të tërheqen kufijtë dhe Maqedonia formalisht të jetë shtet federal”, tha Mickovski.
Ai e akuzoi Kovaçevskin se për këtë “merr kompensime të caktuara financiare”, por i tha se “të gjitha këto do të diskutohen pas zgjedhjeve, sepse të gjitha këto janë vetëm informacione”.
“Kjo është arsyeja pse është shumë e rëndësishme që ai të mbetet dinjitoz. Muaj janë në pyetje dhe të mos i bëjmë dëme shtesë identitetit maqedonas”, tha Mickoski.
Menjëherë ka ardhur reagimi i LSDM-së: “Tani, në vend që VMRO-DPMNE të përgjigjet nëse do të anëtarësohet në bllokun evropian apo do të mbetet peng i Levicës, Mickoski po sajon marrëzi të reja për gjoja ridefinimin e shtetit. Është e qartë se Mickovski dhe VMRO-DPMNE synojnë të ikin nga vendimi nëse do të anëtarësohen në bllokun pro-evropian apo do të mbeten me Levicën në bllokun antievropian”, tha Jaklina Lazareska, deputete e LSDM-së.
Sipas saj, është koha për votim për Evropën në Kuvendin e Maqedonisë, e jo për trillime të reja të pakuptimta që nuk kanë lidhje me realitetin.
“I bëjmë thirrje edhe Kristian Mickoskit dhe VMRO-DPMNE-së që të mendojnë dhe në fund të përgjigjen: A do t’i bashkohen bllokut evropian apo do të mbetet peng i Levicës?”, pyeti deputeti.
Mickoski edhe dje nga foltorja në Strumicë e hapi temën për gjoja federalizimin e shtetit. Ai ka theksuar se ndryshimet kushtetuese që po i detyrojnë ekspertët e Qeverisë janë në drejtim të një shteti binacional.
“Ripërcaktimi i Preambulës së Kushtetutës do të ishte një lloj tradhtie kombëtare ndaj kësaj Qeverie që do ta gjunjëzonte vendin. E paralajmëroj Kovaçevskin që të mos luajë lojëra me amendamentet kushtetuese që do ta ridefinojnë Maqedoninë në një shtet binacional, të mos bëjë lëshime ndaj BDI-së, sepse ai po paguan shumë çmim për pushtetin që ka”, tha Mickoski.