Bullgarët etnik nga Maqedonia e Veriut u bëjnë thirrje autoriteteve bullgare që të mos bëjnë asnjë lëshim për Shkupin dhe as të tregtojnë me veton në këmbim të heqjes së vizave amerikane dhe hyrjes në zonën Shengen, përcjell KDP.
Organizatat e tyre, nëpërmjet një letre lëshuar autoriteteve në Sofje, kanë dërguar një porosi të qartë: “Ju apelojmë: mos bëni asnjë lëshim për çështjen e barazisë sonë. Ajo nuk mund dhe nuk duhet të jetë objekt negociatash dhe garancia e saj nuk mund të jetë një premtim bosh për një të ardhme të pasigurt. Procedura kushtetuese për regjistrimin e bullgarëve maqedonas duhet të fillojë menjëherë dhe tani. Bullgarët duhet të përmenden në mënyrë eksplicite, njëlloj midis pjesëve të tjera të popujve në Kushtetutën e Republikës së Maqedonisë së Veriut”.
Ideja për tregti me veton e integrimit evropian të Maqedonisë së Veriut erdhi nga lideri i ITN Slavi Trifonov dy ditë më parë, por u refuzua shpejt nga partnerët e koalicionit në qeverinë bullgare.
“Çelësi i zgjerimit të ardhshëm të Bashkimit Evropian duhet të jetë barazia dhe mirëqenia e të gjithë popujve në rajon dhe e atyre pjesëve të tyre që, bazuar në një histori komplekse ballkanike, tani jetojnë në vendet fqinje, mes kombeve të tjera”, thuhet në letrën e përbashkët disa organizatave të bullgarëve etnik nga Maqedonia e Veriut, dërguar presidentit bullgar Rumen Radev, kryeministrit Kiril Petkov, kryetarit të Kuvendit Popullor Nikolla Minçev dhe kryetarëve të grupeve parlamentare të partive politike.
Bullgarët nga RMV shkruajnë se janë të gatshëm të punojnë për të mirën e vendit të tyre, por si qytetarë të barabartë, e jo si qytetarë të kategorisë së dytë. Sipas tyre, kjo mund të ndodhë vetëm nëse marrin garanci kushtetuese për barazinë e tyre me kombet e tjera. të cilat janë të shkruara në kushtetutën e Maqedonisë. “Ne nuk duam asgjë më shumë se barazi. Ne duam, si të gjitha pjesët e tjera të popujve të RMV, t’i gëzohemi gjuhës, traditave, historisë, monumenteve dhe gjithçka tjetër që lidhet me identitetin tonë.”, theksohet në letër.
“Thirrja e Kuvendit të ri Kombëtar dhe formimi i qeverisë së re bullgare na jep shpresë se këto interesa tona do të mbrohen me vendosmëri nga ju, si udhëheqës shtetërorë dhe politikë të Bullgarisë, duke qenë se mbi 120 mijë prej nesh janë qytetarë të Republika e Bullgarisë, në bazë të origjinës së provuar bullgare, dhe dhjetëra mijëra të tjerë janë në proces të marrjes së shtetësisë bullgare”, shkruajnë organizatat bullgare nga Maqedonia e Veriut.
Letra, e publikuar nga agjencia bullgare Bgnes, është nënshkruar nga disa organizata bullgare me seli në Shkup, Manastir, Prilep, Ohër, Koçan dhe qytete të tjera.