E premte, 17 Maj, 2024

KRYEMISTRI POLAK PËR THELLIMIN E KRIZËS SË MIGRANTËVE

Kryeministri polak, Mateusz Morawiecki, ka paralajmëruar se Evropa do të përballet me fluks të “miliona” migrantëve, nëse nuk ashpërsohen politikat nëpër kufi. Sipas tij, situatanë kufirin e vendit të tij me Bjellorusinë paraqitet e ‘qëndrueshme, por me rrezik në rritje’.

Në një intervistë për mediumin gjerman, ‘Bild’, ai ka thënë se nuk e përjashton rrezikun e luftës, marrë parasysh zhvillimet në kufirin mes Polonisë dhe Bjellorusisë: “Nëse ne nuk do të jemi në gjendje të largojmë mijëra migrantë tani, shumë shpejt do të jenë edhe qindra mijëra, miliona tjerë të nisur drejt Evropës,” – ka thënë Morawiecki, transmeton KDP njoftimin e Radios Evropa e Lirë.

“Nëse ne nuk mbrojmë me vendosmëri kufijtë tanë në Evropë, qindra miliona persona nga Afrika dhe Lindja e Mesme do të tentojnë të arrijnë në Evropë, dhe sidomos në Gjermani”, ka deklaruar ai duke e përshkruar situatën në kufi me Bjellorusinë si të qëndrueshme, por me rrezik në rritje.

Rreth 900 migrantë në kufi me Poloninë kanë kaluar natën mes të mërkurës dhe të enjtes në ambient të jashtëm, për të 11-ën ditë me radhë. Disa prej tyre janë ankuar për vështirësi në frymëmarrje, për shkak të tymit të zjarreve për t’u ngrohur.

Brukseli ka akuzuar liderin autoritar të Bjellorusisë, Alyaksandr Lukashenka se ka krijuar krizën me migrantë si hakmarrje ndaj disa raundeve të sanksioneve të BE-së kundër këtij shteti, pas mbajtjes së zgjedhjeve presidenciale në gusht të vitit 2020, zgjedhje këto të cilat nga Perendimi u cilësuan si të manipuluara.

KDP

Të fundit