E premte, 21 Qershor, 2024

ÇFARË QEVERIE PO “QENDIS” MICKOSKI?

Bisedimet e VMRO-DPMNE-së me VLEN-in janë në një fazë të avancuar, por ende nuk ka marrëveshje përfundimtare dhe derisa marrëveshja të zyrtarizohet, nuk do të japen detaje, thonë nga dy palët, përcjell KDP.

Ndërkohë që thonë se “përzgjedhja e kuadrove me vlera të larta morale, të cilët do të punojnë me përkushtim në proceset reformuese, është një nga qëllimet kryesore në bisedimet mes VMRO-DPMNE-së dhe VLEN në përzgjedhjen e zgjidhjeve e kuadrove për përbërjen e qeverisë së ardhshme”.

Ndonëse ka pasur spekulime se bisedimet janë afër përfundimit, nga VMRO-DPMNE për DW thonë se ende nuk ka marrëveshje përfundimtare, por se bisedimet janë në një fazë të avancuar.

“Procesi i negociatave bazohet në parime, para së gjithash në procesin e integrimit evropian, pastaj në luftën kundër korrupsionit, si dhe në nevojën për reforma për zhvillim ekonomik”, shpjegon për DW një burim i lartë nga VMRO-DPMNE.

“Në atë kontekst, VMRO-DPMNE i kushton vëmendje zgjidhjeve personale që ofrohen në negociatat për koalicionin, ndërsa ato në asnjë mënyrë nuk duhet të komprometohen dhe duhet t’i përkushtohen punës dhe reformave. Për momentin, ajo që mund të thuhet është se negociatat janë në një fazë të avancuar, por ende nuk ka marrëveshje përfundimtare dhe derisa marrëveshja të zyrtarizohet, nuk do të japim detaje. Diskutohen dikastere që kanë karakter ekonomik dhe politik, por më e rëndësishmja është që të pranojnë parimet e qeverisë dhe objektivat e programit të përgjithshëm. Në negociata i kushtohet vëmendje cilësisë së vetë ndarjes dhe numrit të deputetëve të fituar nga VMRO-DPMNE. Negociatat do të vazhdojnë edhe në ditët në vijim”, sqaron bashkëbiseduesi i DW.

Me ton të ngjashëm foli edhe kryetari i VMRO-DPMNE-së, Hristijan Mickoski, në ceremoninë e shënimit të 24 majit në Kalishtë të Strugës.

“Përkrahja e madhe që morëm nga qytetarët do të thotë një përgjegjësi e madhe për të dalë me fytyrë të pastër para qytetarëve dhe për të treguar se si janë gjërat realisht dhe pa zbukurime, por edhe për të arritur rezultate të shpejta. Pason një kapitull i ri, ku shteti i kthehet popullit dhe Maqedonia duhet të ketë rezultate dhe forcë për fitore të mëdha. Kapitulli i ri bazohet në përgjegjësi, në moral dhe vlera, të cilat janë kredo detyruese që duhet respektuar”, theksoi Mickoski.

Sipas tij, formimi i qeverisë është hapi i lehtë dhe më i rëndësishmi është të realizohet ajo që u është premtuar qytetarëve.

“Së shpejti do të kemi një qeveri të re. E donim që në ditën e parë të kësaj beteje të madhe tonën. Por krijimi i qeverisë është hapi i lehtë, sepse hapat e mëdhenj duhet të jenë rezultatet që duhet të japim. Shihen shumë njerëz në pozita, funksione dhe vende të ndryshme, por për mua nuk ka qenë asnjëherë biletë për një jetë të mirë, por obligim i përgjegjësisë së madhe ndaj atij që e jep këtë pushtet, që është populli”, theksoi Mickoski.

Ai paralajmëroi se çdo dështim i pushtetarëve të ardhshëm do të jetë zhgënjim për qytetarët për të cilët ata janë zotuar se do t’i japin fund sundimit aktual.

“Mbështetja e marrë duhet të fitohet dhe të punohet. Duhet të tregohet virtyti i detyrueshëm, shembulli në qeverisje dhe përgjegjësi. Punoni pa pushim që nga dita e parë, zgjidhni sa më shumë probleme dhe bëhu ndryshimi që mund dhe duhet të shihet nga ora e parë. Të gjithë do të kenë një shans, secili prej jush, por ai shans është një detyrim që duhet ta përmbushni. Dijeni se keni besimin tim, por do të keni edhe egërsinë time absolute pa falje nëse ndonjëri prej jush futet në lojëra korruptive apo prapaskenash”, tha Mickoski para audiencës, ku përfshiheshin edhe një numër i bashkëpartiakët e tij.

Ndërsa bisedimet për përbërjen e qeverisë janë ende në vazhdim, ajo për të cilën duhet të bien dakord fillimisht partnerët e mundshëm është se kush do të jetë kryetar i Kuvendit, pasi seanca konstituive e përbërjes së re të Kuvendit do të fillojë më 28 maj. Sipas Rregullores së re, nuk mund të zgjasë më shumë se tri ditë dhe duhet të përfundojë me zgjedhjen e kryetarit të Kuvendit.

Ajo që për momentin as e konfirmon e as e mohon është se është arritur marrëveshje që lideri i Alternativës, Afrim Gashi, të marrë pozitën e kryetarit të Kuvendit. Madje ai nuk ka dhënë një përgjigje konkrete në daljen e pardjeshme në Alast Tv.

“Për ne ka qenë e rëndësishme që shqiptarët të vazhdojnë të kryejnë një nga tre funksionet në shtet dhe sigurisht, duke qenë se dihet se kush do të jetë kryeministër dhe kreu i shtetit, ne kërkuam që kryetari i Kuvendit t’u përkasë shqiptarëve. Kontrata nuk është ende përfundimtare, kemi rënë dakord në parim për disa qëndrime. Është e drejtë të presim që ajo që kemi rënë dakord me VMRO-DPMNE-në të kalojë në organet tona partiake dhe besoj se brenda afatit ligjor kushtetues, që është 28 maji, dita kur do të konstituohet parlamenti, të gjithë do ta kemi të qartë. ideja se kush është propozimi i përbashkët i koalicionit për kryetar të Kuvendit”, tha Gashi.

Seanca e 28 majit do të ketë tri pika në rend dite: zgjedhjen e Komisionit Verifikues, zgjedhjen e Komisionit për Zgjedhje dhe Emërime dhe zgjedhjen e Kryetarit të Kuvendit. Pas zgjedhjes së kryetarit të Kuvendit, ai duhet ta njoftojë kryetaren Gordana Siljanovska-Davkova se janë verifikuar mandatet e deputetëve. Prej atëherë fillojnë të ecin dhjetëditëshi, në të cilin presidenti duhet t’i caktojë mandatin për formimin e qeverisë, kandidatit të partisë apo partive që kanë shumicën në Kuvend./DW

Të fundit