Kryetari i VMRO-DPMNE-së dhe mandatar për formimin e qeverisë së re, Hristijan Mickoski, ka takuar liderët e 21 partive të koalicionit “Maqedonia juaj”, me ç’rast ka shënuar fillimin e negociatave për përbërjen e qeverisë së re të Maqedonisë së Veriut, përcjell KDP.
Nga e hëna do të nisin bisedime edhe me partitë tjera opozitare, me të cilat, siç tha Mickoski, që do të gjenin pikë të përbashkët lidhjeje me VMRO-DPMNE-në me qëllim që t’u jepet mundësi të gjithëve.
“Qytetarët do të jenë krenarë për qeverinë e re. Ne do të negociojmë me të gjitha partitë opozitare, por kjo nuk do të thotë se të gjitha do të jenë pjesë e qeverisë së re”, tha Mickoski.
Sipas afateve në Kushtetutë, Qeveria duhet të propozohet më së voni deri në fund të qershorit. Ajo duhet të votohet me shumicë prej 61 deputetësh nga gjithsej 120 në Parlament.
Mickoski është i bindur se në një kohë sa më të shkurtër do ta formojë Qeverinë.
Është e sigurt se Qeveria e re do të përbëhet nga VMRO-DPMNE me 58 deputetë dhe VLEN, koalicioni i partive opozitare të shqiptarëve me 13 mandate parlamentare të fituara.
Sipas Mickoskit, koalicioni VLEN me 107.000 vota në zgjedhjet parlamentare të 8 majit është partner kredibil në Qeverinë e ardhshme.
Por Mickoski ka matematikë tjetër – ai pret që 61 deputetë të konsolidohen deri më 28 maj, kur duhet të konstituohet Parlamenti. Disa deputetë të zgjedhur në Kuvend, individë nga koalicione të tjera, tashmë kanë dërguar “sinjale” se duan të anojnë nga VMRO-DPMNE.
Në këtë mënyrë koalicionet VMRO-DPMNE dhe VLEN së bashku do të kishin 74 apo 75 deputetë në Kuvend.
“Qëllimi ynë është që si qeveri të kemi mbështetjen e dy të tretave në parlament. Duhet të bëjmë një rindërtim në vetë qeverinë, në vetë kabinetin qeveritar, që t’u përgjigjemi nevojave të qytetarëve dhe kohëve të reja”, tha Mickoski në Kanalin 5.
Kryeministri në largim Talat Xhaferi nga BDI, pas fjalimit me rastin e 100 ditëve të qeverisjes, nuk ka komentuar nëse BDI është gati për opozitë pas më shumë se 20 vitesh në pushtet.
“Do të shohim sipas përllogaritjeve se si do të jenë bisedat mes subjekteve. Unë jam kryeministër dhe jam i fokusuar në obligimet e mandatit që duhet të kryej, i cili zgjat deri në konstituimin e një mandati të ri”, tha Xhaferi.
Duke iu përgjigjur pyetjes se a do të bisedojë me ZNAM dhe LEVICA për të qenë pjesë e qeverisë, Mickoski tha se bisedimet do të zhvillohen në dy drejtime – do të bisedojë me të gjitha partitë që janë pjesë e opozitës, si dhe me të gjithë deputetët për vizionet dhe politikat që qeveria e ardhshme planifikon t’i zbatojë ato.
Si në VMRO-DPMNE ashtu edhe në VLEN thonë se deri më tani nuk kanë diskutuar për ndarje konkrete të portofoleve dhe për emrat e ministrave në qeverinë e ardhshme. Në këtë kuptim, është e pasigurt nëse ministrat e VMRO-DPMNE-së që tani janë në qeverinë teknike do të mbeten në detyrë.
Maksim Dimitrievski, lideri i ZNAM-it, pothuajse u ofrua si partner i tretë në Qeveri.
“Pjesëmarrja në qeveri po, por vetëm në kushtet tona. Ne gjithmonë do të jemi në dispozicion të çdo qeverie të ardhshme kur bëhet fjalë për interesat shtetërore dhe kombëtare, por përveç kësaj kryesia e partisë do t’i shqyrtojë të gjitha mundësitë dhe opsionet për koalicion apo për të punuar si opozitë konstruktive”, tha Dimitrievski.
Ai tha se do të marrë pjesë në qeverisje nëse aty nuk ka vend për BDI-në, ndërsa nënvizoi se nuk ka asgjë kundër VLEN-it, me të cilin koalicion bashkëpunon në nivel lokal.
Si “Znam” dhe “Levica” fituan nga gjashtë mandate parlamentare.
Analisti politik dhe drejtori ekzekutiv i MCMS, Aleksandar Kërzhalovski, konsideron se konturet e qeverisë së re tashmë janë të përcaktuara.
“Mendoj se tashmë është mjaft e qartë, pa marrë parasysh faktin se BDI-ja fitoi në bllokun shqiptar, edhe pse nuk është më bllok shqiptar sepse ka parti edhe nga shumica e komuniteteve të tjera etnike. VMRO-DPMNE konfirmoi se VLEN është partneri i preferuar. Me shumë mundësi është koalicioni i caktuar. Pyetja e vetme do të jetë nëse edhe “Znam” do t’i bashkohet qeverisë së re të koalicionit apo do të mbeten vetëm VMRO-DPMNE dhe VLEN”, tha Kërzhalovski për REL.
VMRO-DPMNE më herët ka vendosur kornizën mbi të cilën do të ndërtohet potenciali i koalicionit me partitë tjera.
Ka tre postulate në të: një shtet i fortë ekonomikisht, një front kundër krimit dhe korrupsionit dhe realizimi i interesit strategjik për integrimin evropian.