Një rritje alarmante të euroskepticizmit ka treguar anketa e fundit e organizatës Eurothink, e realizuar nga agjencia Brima nga data 12 dhjetor deri më 27 dhjetor 2022 në një kampion përfaqësues prej 1006 të anketuarve. Siç përcjell Kdp.mk, vetëm 49% e qytetarëve mendojnë se anëtarësimi në bashkimin Evropian (BE) është një gjë e mirë, krahasuar me 34% që mendojnë se nuk është proces që sjell përfitime. Përveç kësaj, rritet edhe shkalla e pesimizmit në opinion: 29% e të anketuarve besojnë se Maqedonia nuk do të hyjë kurrë në BE, për dallim nga viti 2021 kur 17% menduan kështu.
Për sa i përket vlerave themelore shoqërore, madje 61% e të anketuarve besojnë se nuk ka demokraci. Pakënaqësia e madhe e përgjithshme reflektohet edhe përmes mendimit të qytetarëve për drejtimin e shtetit, ku 72% mendojnë se Maqedonia e Veriut po ecën në drejtim të gabuar.
Për 17 për qind të të anketuarve, qëndrimi i BE-së ndaj vendit është “i drejtë, miqësor dhe korrekt”, ndërsa 65 për qind e konsiderojnë atë “të padrejtë, arrogant dhe shantazhues”. Në vitin 2021, situata ishte ndryshe – 30 përqind mendonin se marrëdhënia ishte e drejtë dhe 48 përqind mendonin se ishte e padrejtë.
Në lidhje me dilemën nëse Maqedonia e Veriut do të ndryshojë Kushtetutën në vitin 2023 dhe do të vazhdojë negociatat me Bashkimin, rezultatet tregojnë se është një garë e vdekur. 38 për qind e të anketuarve janë përgjigjur pozitivisht, ndërsa 39 për qind kanë qëndrim negativ. “Nuk e di” – janë përgjigjur 21 për qind e të anketuarve dhe 2 për qind kanë refuzuar të japin përgjigje.
Është rritur shqetësimi i qytetarëve nëse një shtet apo një organizatë ndërkombëtare paraqet kërcënim për Maqedoninë, ku 42% e të anketuarve mendojnë se ekziston kërcënim, për dallim nga 33% vitin e kaluar. Bullgaria (27%) dhe Rusia (4%) përmenden si kërcënimi më i madh nga lista.
Sipas rezultateve, 37 për qind e të anketuarve kanë përmendur Serbinë si shtetin që është miku më i madh i Maqedonisë. Të dytat në listë me 11.4 për qind janë SHBA, Turqia me 8.4, BE me 8.1 dhe Gjermania me 4 për qind. 11.6 për qind e të anketuarve besojnë se vendi nuk ka miq.