Biznesmeni nga Struga, Mendi Qyra, është zgjedhur të drejtojë Odën Ekonomike të Maqedonisë Veriperëndimore (OEMVP), raporton KDPOLITIK.COM.
Kjo Odë, që grumbullon pjesën më të madhe të bizneseve shqiptare në Maqedoninë e Veriut, sot ka mbajtur Kuvendin Zgjedhor të V-të që nga themelimi i saj në vitin 2005.
Ndër tjerash u zgjodhën edhe kuvendarët dhe zv/ kryetari i Kuvendit, 18 anëtarë të Këshillit Drejtues si dhe 5 anëtarë të Këshillit Mbikëqyrës.
Kryetari i posazgjedhur, Mendi Qyra, në fjalën e tij drejtuar kuvendarëve dhe përfaqësuesve të organeve tjera, u shpreh se udhëheqësinë e tij e bazon mbi parimet dhe vlerat bazë të OEMVP-së, si dhe bazuar në Misionin dhe Vizionin e saj në mbrojtjen dhe avancimin e bizneseve anëtare të saja.
Pjesëmarrësit thanë se Oda Ekonomike e Maqedonisë Veri-Perëndimore do të vazhdojë më fuqishëm në rrugëtimin e saj në organizimin dhe mbrojtjen e biznesit në vend nën ombrellën e misionit të dëlirë, duke dëshmuar me këtë Kuvend kapacitet dhe vazhdueshmëri të punës së saj tash e 18 vite.
Ndryshe, OEMVP u themelua në vitin 2005, kur kryetar i parë u zgjodh Xhemail Dauti, drejtor ekzekutiv i kompanisë së njohur “Dauti-Komerc”. Edhe Dauti ka qenë pjesë e Kuvendit Zgjedhor duke dëshmuar kështu përkushtimin e tij në realizimin e vizionit të OEMVP-së.