Atë që premtuam në takimin tonë në tetor 2023, po e realizojmë në pesë ditët e para të formimit të Qeverisë së re.
Këtë e deklaroi sot kryeministri Hristian Mickoski gjatë një takimi me pensionistët, ku mori pjesë edhe Ministri i Punës dhe Politikës Sociale, Fatmir Limani.
“Është bërë një analizë e detajuar dhe në bazë të saj është premtuar se në vitin e parë të mandatit do të bëhet rritje lineare e pensioneve për pesë mijë denarë. Sot në seancën e Qeverisë, për informim, arritëm në përfundimin se pensionet që duhet të nivelizohen, tani në muajin shtator, e më pas në muajin mars të vitit të ardhshëm, do të përfshijnë atë rritje lineare – e para nga 2.500 denarë tani në shtator, dhe më shumë 2.500 denarë edhe në mars. Kjo do të thotë se fillimisht për tre muaj, pastaj për 9 muaj, më herët se një vit që e premtuam, ato 5000 denarë rritje lineare të pensioneve për pensionistët do të paguhen menjëherë”, shkroi Mickoski në Facebook.
Të dhënat e Ministrisë së Punës dhe Politikës Sociale tregojnë se numri i pensionistëve në mars të këtij viti ka arritur në 338.336 persona. Shumica e tyre janë pensionistë që kanë marrë pension në bazë të viteve, ose më mirë kanë marrë pension pleqërie në bazë të stazhit.
Shifrat thonë se ndonëse ka një rritje të numrit të pensionistëve në vendin tonë, ne kemi gjithnjë e më pak përfitues të pensioneve bujqësore dhe ushtarake.
Pensionet në vendin tonë ndahen në pesë kategori. Kemi pension familjar, mesatarja e të cilit është 16.707 denarë, pastaj pension invaliditeti me pension mesatar prej 18.818 denarë. Pensioni i pleqërisë arrin mesatarisht 22.826 denarë, ndërsa pensioni mesatar bujqësor arrin në 10.991 denarë. Pensioni ushtarak ka mesataren më të lartë prej 29.943 denarë.
Të dhënat e Ministrisë së Punës dhe Politikës Sociale tregojnë se në Maqedoni janë 2.861 persona që marrin pension më të madh se 57.487 denarë.