Një grua dyshohet se është vrarë me armë zjarri nga bashkëshorti i saj në banesën e tyre në Pejë, njofton Radio Evropa e Lirë, përcjell KDP.MK
Kështu konfirmoi për Radion Evropa e Lirë, Shkodran Nikqi, zëdhënës i Prokurorisë Themelore në Pejë.
Nikqi tha se i dyshuari është arrestuar dhe i është konfiskuar arma.
“Jemi në pritje të Institutit të Mjekësisë Ligjore që të tërheqë trupin e pajetë” nga vendi i ngjarjes, tha ai.
Osmani: Nuk kemi jetë vajzash dhe grash për të humbur
Presidentja e Kosovës, Vjosa Osmani, gjatë pjesëmarrjes në një ngjarje në Prishtinë, dënoi vrasjen në Pejë, duke theksuar se të gjithë e kanë për detyrë të mbrojnë gratë dhe vajzat.
“Fatkeqësisht, sot të gjithë jemi zgjuar në mëngjes me lajmin e tmerrshëm për vrasjen edhe të një gruaje nga bashkëshorti i saj. Ky fenomen i tmerrshëm që po e plagos shoqërinë dhe shtetin tonë, ky femicid i cili për fat të keq ka marrë përmasa të jashtëzakonshme, duhet të ndalet me çdo kusht. Dhe, mënyra e vetme për ta ndaluar atë është në qoftë se rizgjohemi të gjithë si shoqëri, si shtet, e si komb. Rizgjohemi sërish në këmbë kundër këtij fenomeni sepse nuk kemi jetë vajzash e grash për të humbur”, tha Osmani.
57 gra të vrara në 14 vjet
Nga viti 2010 deri në prill të vitit 2024, në Kosovë janë vrarë 57 gra. Organizatat për mbrojtjen e të drejtave të njeriut, në disa raste, kanë fajësuar autoritetet për dështim në mbrojtjen e grave të rrezikuara nga dhuna. Në të shumtën e rasteve, autorë të vrasjeve kanë qenë bashkëshortët, pastaj baballarët dhe djemtë.
Presidentja Osmani tha se kjo ngjarje ndodhi një ditë pas nisjes së edicionit të dytë të Forumit për Gratë, Paqe dhe Siguri, ku u diskutua për dhunën ndaj grave.
“Ju bëj thirrje të gjithëve, aktivistë të shoqërisë civile, institucione të sigurisë e drejtësisë, qytetarë, gra e burra bashkë që të ndalim një herë e përgjithmonë dhunën mbi bazë gjinore, që po e njollos shtetin tonë dhe mund ta shkatërrojë atë përbrenda”, shtoi Osmani.
Haxhiu: Shpesh dhunuesit janë bërë vrasës për shkak të mosndëshkimit adekuat
Për vrasjen në Pejë reagoi edhe ministrja e Drejtësisë, Albulena Haxhiu, e cila tha se pavarësisht “masave të ndërmarra, fushatave të iniciuara me qëllim pikërisht barazinë gjinore, vrasjet ndaj grave po vazhdojnë”.
Ajo tha se ka thirrur për sot një takim me ministrin e Punëve të Brendshme, kryesuesit e këshillave, ushtruesin e detyrës së kryeprokurorit dhe drejtorin e Policisë së Kosovës dhe “po ashtu në një takim tjetër edhe mbledhjen e grupit ndërministror” për të trajtuar çështjen e vrasjes së grave.
“Shpeshherë dhunuesit janë bërë vrasës pikërisht për shkak të mosndëshkimit adekuat nga institucionet përkatëse”, shkroi Haxhiu në rrjetin social Facebook.
Vrasja në Pejë është rasti i dytë brenda pesë ditësh në Kosovë kur gratë dyshohet se u vranë nga partnerët apo ish-partnerët e tyre.
Më 12 prill, një 21-vjeçare u vra brenda zyrës së Qendrës për Punë Sociale në Ferizaj.
Mediat raportuan se dorasi ishte ish-bashkëshorti i saj.
Ndaj tij, autoritetet kanë shqiptuar masën e paraburgimit prej një muaji.
Nga viti 2010 në Kosovë janë vrarë 57 gra.
Si mund ta raportoni dhunën në familje?
Nëse keni nevojë të raportoni dhunë në familje, këta janë numrat e vënë në dispozicion:
Policia e Kosovës: 192 dhe 0800 19 999
Mbrojtësit e Viktimave: 0800 11 112