E enjte, 20 Qershor, 2024

A MUNDET SHEFI I RI I USHTRISË SË UKRAINËS, I CILI NJIHET SI ‘KASAP’, TA MPOSHT RUSINË?

Komandanti i ri i Suprem, Oleksandar Sirski, ka një histori të gjatë fitoresh taktike në fushëbetejë, por shumëçka varet nga ndihma ushtarake amerikane, – përcjell kdp.mk.

Komandanti i ri i Suprem i Forcave të Armatosura të Ukrainës, gjeneralkoloneli Oleksandr Sirsky, ka fituar një reputacion të frikshëm si komandant ushtarak në luftën me Rusinë, por ai po përballet me sfida të mëdha, duke përfshirë mënyrën e mobilizimit të forcat e reja dhe luftën kundër korrupsionit.

Javën e kaluar, Presidenti Volodymyr Zelensky shkarkoi një numër të madh gjeneralësh të lartë në një përpjekje për të “spastruar” administratën e forcave të dhjetuara të armatosura të vendit, të ballafaquar me mungesë të njerëzve dhe armëve.

Në listën e 15 gjeneralëve të shkarkuar është edhe komandanti i përgjithshëm popullor Valery Zaluzhny, që e zëvendësoi Sirski – të cilin disa e përshkruajnë si një “kasap” që nuk denjon për humbjen e jetës së njerëzve. Disa komandantë të forcave të përbashkëta, rezervistë ushtarakë, të forcave tokësore dhe ajrore, si dhe disa zëvendës e këshilltarë të tyre, i mbijetuan pushkatimit.

“Në mendimin e parë, ky veprim është krejtësisht i paprecedentë”, – tha Nikolay Mitrokhin nga Universiteti gjerman i Bremenit, i cili ka shkruar analiza të hollësishme të luftës ruso-ukrainase që nga fillimi i konfliktit më 2022.

“Gjoja se është koordinuar me Komandantin e ri të Përgjithshëm Sirsky, i cili emëroi njerëzit me të cilët do të donte të punonte në ekip”, – tha Mitrokhin për Al Jazeera.

Vala e dorëheqjeve pasoi dështimin e kundërofensivës së vitit të kaluar që synonte rimarrjen e zonave të pushtuara në jug dhe në lindje të Ukrainës, skandalet  korruptive, vonesat e gjata të ndihmës ushtarake perëndimore dhe drejtimin  kaotik të forcave të armatosura.

Mirëpo, përmasat e shkarkimeve pasqyrojnë mënyrën se si Zelensky po e drejton  Ukrainën që nga ardhja në pushtet në vitin 2019.

“Vendimi për t’i “pushuar të gjithë”, jo vetëm ata që nuk ia dolën, por edhe ata që janë pjesë e gjeneratës apo ekipit të gabuar, është shumë në stilin e Zelenskit”, -tha Mitrokhin.

Të vetmit oficerë të lartë që kanë mbajtur punët e tyre janë ata që komanduan operacione të suksesshme kundër flotës ruse në Detin e Zi, së bashku me disa shefa të forcave ajrore dhe të mbrojtjes kundërajrore që “demonstrojnë sukses ose stabilitet në zmbrapsjen e sulmeve ruse”, – tha ai.

Sfida të numërta

Shefat e rinj të ushtrisë janë përballur me një sërë sfidash – kurse në vend të parë është mobilizimi.

Kievi nuk njofton humbjet në front, por Uashingtoni beson se Ukraina ka humbur të paktën 70.000 ushtarë.

Zaluzhni i revokuar donte të mobilizonte 500.000 njerëz, por Zelenski e hodhi poshtë këtë ide, duke u frikësuar nga protestat e popullit dhe duke përmendur kufizimet në trajnime, strehim dhe armatim.

Besohet se mijëra ukrainas të aftë për të luftuar janë larguar nga vendi – ose kanë  kaluar ilegalisht kufijtë e Ukrainës, në rrugë tokësore ose madje duke notuar nëpër lumin e ftohtë akull të Prutit, afër Moldavisë.

Disa oficerë u arrestuan pasi morën ryshfet në shumën prej disa mijëra apo dhjetëra mijëra dollarëve për të “liruar” dikë nga shërbimi ushtarak.

Zelensky shkarkoi të gjithë oficerët rajonalë të rekrutimit, duke i zëvendësuar ata me veteranë, performanca luftarake e të cilëve ishte verifikuar nga shërbimet e inteligjencës.

Mirëpo, mes humbjeve shkatërrimtare në njerëz, ata nuk arritën të mobilizonin mjaftueshëm njerëz për vijën e frontit të gjatë 1.000 kilometra.

“Më çoi të jem mish për top”

Ndërkohë, disa ushtarë injorojnë vlimet në udhëheqjen ushtarake ukrainase.

Një veteran me përvojë, i cili është në shërbim ushtarak nga viti 2014, pasi separatistët pro-rusë sulmuan Kievin në rajonin juglindor të Donbasst, sapo është kthyer nga vija e frontit dhe ishte sidomos mosbesues ndaj gjeneralit të ri Sirski.

“Ky njeri më dërgoi të vdisja, sikur të isha mish për top”, – tha ai për Al Jazeera, duke folur në kushte anonimiteti, duke shpjeguar se ushtarët që ankohen për eprorët e tyre ose korrupsionin përfundojnë duke u dërguar në vendet më të rrezikshme në vijën e parë për t’u vrarë.

Ai pohon se mjekët janë udhëzuar të injorojnë plagët dhe lëndimet  e rrezikshme për jetën.

“Njeriu i humbi të dyja këmbët dhe ata ende e trajtonin sikur të ishte i aftë për shërbim”, – tha ai.

Ushtarë të tjerë thuhet se u ankuan për taktikën prej “kasapi” të Sirskit duke shpërfillur humbjen në njerëz.

Në fjalimin e tij të parë publik në postin e ri, Sirski u përqendrua në këto shqetësime.

“Jeta dhe shëndeti i ushtarëve kanë qenë gjithmonë dhe janë vlera më e madhe e ushtrisë ukrainase”, – tha Sirski më nëntë shkurt.

Ish-zëvendësi i Shtabit të Përgjithshëm të Forcave të Armatosura të Ukrainës thotë se Sirski është dukshëm më “i ashpër” se paraardhësi i tij.

“Duke gjykuar nga veprimet e tij të mëparshme, ai ka një qasje më të ashpër kur është fjala për përgatitjen dhe organizimin e aksioneve si dhe për marrjen në përgjegjësi të vartësve të tij”, – tha për Al Jazeera gjeneralkoloneli Ihor Romanenko.

Mirëpo, Sirski  është “tejet i ndërgjegjshëm në përgatitjet për armikun, ai është i detajuar, studion plotësisht çështjet e furnizimit dhe kështu me radhë,”- tha Romanenko.

Suksese të mëdha nën komandën e Sirskit

Përderisa ishte në krye të forcave tokësore, Sirski ishte meritor për dy suksese të rëndësishme. Njëri është mbrojtja e Kievit në muajin shkurt dhe mars të vitit 2022, kur dhjetëra mijëra ushtarë rusë u përpoqën të rrethojnë kryeqytetin nga veriu.

Nën komandën e Sirskit, grupe të vogla dhe autonome ushtarësh dhe forcash të parregullta sulmuan trupat dhe autoblindat ruse, ndërprenë linjat e tyre të furnizimit dhe përdorën dronë për vëzhgim dhe sulme të befasishme.

Një nga ata ushtarë ishte Bohdan Jaworski, i cili me një grup prej rreth njëzet burrash sulmoi në një pritë, një kolone autoblindash në Buchi në periferi të Kievit.

Ata imobilizuan kolonën duke bombarduar automjetin e parë dhe të fundit , ndërsa pjesën tjetër e mbuluan me granata dhe kokteje molotovi përpara se të largoheshin dhe bënë thirrje për sulm ajror për të shkatërruar pjesën tjetër të automjeteve.

Sirski suksesin e dytë të madh, po ashtu, e shënoi më 2022, kur në fshehtësi grumbulloi këmbësorinë e lehtë në rajonin lindor të Kharkivit për të thyer mbrojtjen ruse dhe për të çliruar të gjithë rajonin pavarësisht epërsisë ruse në artileri.

Zgjidhja e vonesave të ndihmës perëndimore

Vonesa e ndihmës perëndimore është një tjetër sfidë e madhe për udhëheqjen e re të Ukrainës.

Anëtarët e Bashkimit Evropian, të 27-tët, vendosën në fillim të këtij muaji të zhbllokojnë 50 miliardë euro ndihmë, mirëpo republikanët në Kongresin amerikan, të cilët janë dakord me kandidatin presidencial të Partisë Republikane, Donald Trump, edhe më tej kundërshtojnë paketën amerikane prej 60 miliardë dollarësh.

“Është e qartë se BE-ja nuk do ta zgjidhë situatën pa amerikanët. Prandaj  pavendosmëria dhe zvarritja amerikane janë ppërfundimisht të këqija për ne”, – tha Romanenko.

Vonesa nuk do të shkatërrojë ekonominë e Ukrainës, por absolutisht është vendimtare për ushtrinë.

“Ekonomia nuk do të shembet deri në fund të vitit,” – i tha Al Jazeera analisti nga Kievi, Alexei Kushch.

“Problemi kryesor është furnizimi me armë dhe municion. Pa ndihmën amerikane, nuk ka para të mjaftueshme për këtë”./balkans.aljazeera.net/

Të fundit