E martë, 28 Maj, 2024

Reportazhi i BBC për situatën në Ukrainën e bombarduar vazhdimisht nga Rusia: “Monedha” e luftës është gjaku. Më mirë të paguajnë për një armëpushim me tokë, apo me jetë?

Ushtria ukrainase është nën më shumë presion se në çdo kohë që nga javët e para të pushtimit rus, më 24 shkurt. Mund të jetë duke luftuar një betejë të humbur në Luhansk, pjesa veriore e rajonit të Donbasit.

Shtabi i Përgjithshëm i Ukrainës thotë se rusët duket se po përqendrojnë forcat e tyre për një sulm tjetër.

Ditët e fundit, rusët kanë intensifikuar sulmet e tyre përgjatë vijës së frontit të Donbasit – duke iu afruar përfundimit të rrethimit të Severodonetsk, një qytet prej 80,000 banorësh përpara pushtimit.

Ukrainasit, po luftojnë me vendosmëri kokëfortë. Në betejën e tyre po dërgohen përforcime vijimësisht.

“Në vetëm pak minuta pashë rreth 20 mjete të blinduara të stafit ushtarak, ushtarët hipur mbi to, duke lëvizur drejt vijës së frontit – së bashku me tanke në transportues dhe raketahedhës të shumtë. Ata kanë ngadalësuar rusët, por nuk e kanë ndalur sulmin e tyre. Rusët po shkaktojnë viktima të shumta. Një burim ushtarak në Brigadën 57 më tha se një nga njësitë e tyre hyri në front me 240 burra dhe doli me rreth 140 – pjesa tjetër e vrarë, e plagosur dhe e kapur”, tha një dëshmitare për BBC.

Presidenti i Ukrainës, Volodymyr Zelensky, ka thënë se rusët dyshohet të vrasin deri në 100 ushtarë ukrainas në ditë në Donbas. Jo larg Severodonetsk, Bakhmut është një qytet që po shkatërrohet ngadalë nga lufta. Këtë javë është rreth tre milje larg nga rusët, shumë brenda rrezes. Javën e ardhshme mund të jetë shumë më afër.

Në rrënojat në Donbas, fitorja në Kiev në mars – euforia, lavdia dhe sakrifica – ndjehen të largëta. Bakhmut është bombarduar rëndë.

Duke qëndruar para shtëpisë së tij të dëmtuar, një burrë rreth të 40-ave i quajtur Mitri tregoi sfidë, frikë dhe zhgënjim. Ai nuk e kishte idenë se çfarë të priste në qytetin e tij.

“Unë nuk jam Nostradamus. Pse sulmoi Putini? Të gjitha janë lojëra politike.”

Mitri tha se paraardhësi i Presidentit Zelensky, Petro Poroshenko do të kishte arritur një marrëveshje armëpushimi deri tani.

“Të paktën ka pasur paqe më parë, ata negocionin. Është për të ardhur keq për njerëzit që vdiqën, ushtarët. Është një turp i vërtetë.”

Ai tha se ishte faji i Presidentit Zelensky. Ai kishte humbur një mundësi.

Mitri ngriti supet dhe thithi cigaren me zemërim kur u pyet nëse do të pranonte një marrëveshje që i lejonte Rusisë të kontrollonte të gjithë Donbasin, krahasuar me afërsisht një të tretën e territorit që kontrollonte para pushtimit.

“Nuk e di. Çfarë mund të ndryshojë për mua? Gjëja kryesore është të mbetem gjallë. Ky është vetëm fillimi, gjithçka është ende për të ardhur. Nëse mbijetojmë, do të shohim se si do të shkojë.”

Mijëra civilë janë ende në Severodonetsk, ndërsa rusët luftojnë për të rrethuar ushtarët e fundit ukrainas në rajonin e Luhanskut, në anën veriore të Donbasit.

Në stacionin hekurudhor në Pokrovsk, një distancë e sigurt nga beteja, folëm me Lidën, një grua e moshuar që përdor një karrige me rrota. Ajo sapo ishte evakuuar nga Severodonetsk.

Me civilë të tjerë me aftësi të kufizuara dhe të plagosur, ajo po evakuohej në Ukrainën perëndimore ku jeta nuk eshte dhe aq e sigurt me një tren special, i kthyer në një ambulancë dhe njësi të kujdesit intensiv nga organizata mjekësore MSF.

Lida, e cila rrezatonte sfida dhe rreth saj vertitej tymi i cigares, u shpëtua nga ushtarët që e morën atë dhe civilë të tjerë nëpër zona të bombarduara rëndë.

“Ata bombarduan gjithçka, mezi shpëtuam. Xhamat u thyen, gjithçka u shpërnda përreth. Dhe unë nuk jam në gjendje të eci fare. Putini është një i poshtër. Ne jetonim të qetë. Kishte një Bashkimi Sovjetik dhe kështu qoftë. Ata ndanë Ukrainën dhe Rusinë. Prandaj filluan problemet.”

Nëse forcat e Presidentit Putin mund të rrethojnë Severodonetsk, objektivat e tyre të ardhshëm me shumë gjasa do të ishin qytetet kyçe të Kramatorsk dhe Slovyansk në rajonin e Donetskut, në anën tjetër të Donbasit. Pastaj ai mund të shpallë fitoren në betejën për Donbas.

Rusia do të kontrollonte një brez territori që shtrihet përgjatë kufirit të saj në jug nga Donbasi dhe përgjatë pjesës më të madhe të vijës bregdetare të Ukrainës. Presidenti Zelensky thotë se vetëm diplomacia mund t’i japë fund luftës, por ai ka thënë se Rusia duhet të kthehet në pozicionet që kishte para pushtimit.

Aleatët e tij, të udhëhequr nga SHBA dhe Britania e Madhe, duan të dobësojnë përgjithmonë Rusinë e Putinit. Ata kanë thënë se Rusia nuk duhet të fitojë. Kritikët e tyre thonë se do të luftojnë deri në ukrainasin e fundit.

“Monedha” e luftës është gjaku. Ndërsa familjet varrosin të afermit e tyre të vdekur, më shumë ukrainas, si Mitri në Bakhmut, do të vënë në dyshim çmimin e gjakut që po paguajnë dhe do të pyesin nëse është më mirë të paguajnë për një armëpushim me tokë – apo jetë.

Perkthyer nga BBC– Leandro Bardhuli

Të fundit