Shaip Kamberi që ka gjasë të jetë deputeti i vetëm shqiptar në legjislaturën e re të parlamentit të Serbisë, nga ‘Koalicioni i Shqiptarëve’, ka kërkuar të marten që, për shkak të shlyerjes së më shumë shqiptarëve nga listat zgjedhore, të përsëriten zgjedhjet në Luginën e Preshevës. Fjala është për ‘deligjitimim të procesit zgjedhor,’- transmeton KDP reagimin e Kamberit në rrjetet sociale.
Ja postimi i plotë i deputetit Shaip Kamberi në Facebook:
‘“Koalicioni i Shqiptarëve të Luginës” i përbërë nga Partia për Veprim Demokratik bashkë me Partinë Demokratike dhe Lëvizjen e Progresit Demokratik mori 9.644 përkundër vështirësive të shumta me të cilat u përballë në këtë proces zgjedhor.
Zgjedhjet e fundit në Serbi të datës 3 prill u karakterizuan me pjesëmarrje të ulët të votuesve shqiptarë.
Pasivizimi i vendbanimeve të shqiptarëve që rezultoi me shlyerjen e tyre nga listat zgjedhore deligjitimoi procesin zgjedhor, sidomos në Luginën e Preshevës.
Shumë shqiptarëve i është pamundësuar e drejta elementare. E drejta për të votuar. Kjo e bënë procesin zgjedhor jodemokratik. Zgjedhjet jo të lira. Prandaj zgjedhjet duhen të përsëriten në Luginën e Preshevës, duke zgjidhur paraprakisht çështjen e mohimit të së drejtës për të votuar për çdo qytetar të Luginës së Preshevës.
Me këtë rast, dua të falënderoj përzemërsisht të gjithë qytetarët për kulturën e lartë politike që kanë shpërfaqur gjatë këtyre zgjedhjeve.
Përulje për të gjithë aktivistët në radhë të parë të Partisë për Veprim Demokratik dhe të partnerëve tanë politik – Koalicionit të Shqiptarëve të Luginës, që nuk kursyen asgjë prej tyre, gjatë kësaj fushate që më mbështeten pa rezervë. Me gjithë votat e marra ato akoma nuk janë garanci për të fituar një mandate,’ – transmeton KDP reagimin e liderit të shqiptarëve në Luginën e Preshevës.
Partitë shqiptare në Serbi në këto zgjedhje garuan me dy lista: Koalicioni i Shqiptarëve të Bashkuar dhe Alternativa Demokratike Shqiptare – me gjithsej 20 kandidatë.
Në zgjedhjet presidenciale të së dielës, sipas rezultateve paraprake, ka fituar presidenti aktual, Aleksandar Vuçiq, ndërkaq në ato parlamentare partia e tij, Partia Përparimtare Serbe.