Forcat ruse kanë nisur një sulm ushtarak në Ukrainën fqinje, duke kaluar kufijtë e saj dhe duke bombarduar objektiva ushtarake pranë qyteteve të mëdha, njoftojnë mediat nga Kievi, përcjell KDP.
Në një deklaratë televizive para agimit, presidenti rus Vladimir Putin tha se Rusia nuk kishte në plan të pushtonte Ukrainën dhe kërkoi që ushtria e saj të dorëzonte armët.
Pak çaste më vonë, u raportuan sulme ndaj objektivave ushtarake ukrainase.
Ukraina tha se “Putini ka nisur një pushtim të plotë të Ukrainës”.
Automjetet ushtarake ruse thuhet se kanë shkelur kufirin në një numër vendesh, në veri, jug dhe lindje, duke përfshirë edhe rajone në kufi me Bjellorusinë.
Presidenti Volodymyr Zelensky njoftoi se ligji ushtarak tani po vendoset në të gjithë Ukrainën.
“Asnjë panik. Ne jemi të fortë. Ne jemi gati për çdo gjë. Ne do t’i mposhtim të gjithë, sepse ne jemi Ukraina,” tha udhëheqësi ukrainas në një deklaratë video.
Përpara sulmit të Rusisë ai kishte bërë një përpjekje të fundit për të shmangur luftën, duke paralajmëruar se Rusia mund të fillonte “një luftë të madhe në Evropë” dhe duke u kërkuar qytetarëve rusë që ta kundërshtonin atë.
Sirenat paralajmëruese ranë në të gjithë kryeqytetin e Kievit, i cili ka një popullsi prej gati tre milionësh.