E diel, 14 Prill, 2024

Gjyqi që zgjati pesë vjet, “Agimi i Artë” shpallet organizatë kriminale në Greqi (Video)

Një gjykatë në kryeqytetin e Greqisë ka vendosur se partia e ekstremit të djathtë, Agimi i Artë ka funksionuar si organizatë kriminale. Gjyqi që zgjati pesë vite kishte 68 të pandehur dhe përfshiu vrasjen e një reperi dhe rastet e sulmeve të dhunshme.

Protestuesit mbanin parulla që krahasonin partinë politike, e cila është e diskutueshme për pikëpamjet e saj të ashpra anti-emigrante, me nazistët ndërsa qëndronin jashtë gjykatës së Athinës. Videot tregojnë një turmë masive që mbush rrugën kryesore dhe rrugët anësore përreth ndërtesës së gjykatës.

Në vendimin e saj, gjykata vendosi që shtatë ish-ligjvënës të partisë, duke përfshirë udhëheqësin e partisë Michaloliakos, ishin fajtorë për drejtimin e një organizate kriminale. Në total, 68 të pandehur ishin të përfshirë në çështje, duke përfshirë 18 ish-deputetë.

Gjyqi shqyrtoi katër akuza të ndara penale që përfshijnë vrasjen e reperit grek Pavlos Fyssas në 2013, sulme ndaj peshkatarëve emigrantë, sulme ndaj aktivistëve të së majtës dhe nëse Agimi i Artë ishte i përfshirë në veprimtari kriminale.

Gjyqi filloi në 2015, pasi një mbështetës i Agimit të Artë u akuzua për vrasjen e Fyssas, i cili ishte i njohur për pikëpamjet e tij antifashiste. Si rezultat, Michaloliakos dhe më shumë se një duzinë anëtarësh partie u arrestuan dhe u akuzuan për pjesëmarrje në një organizatë kriminale. Agimi i Artë pretendon se gjyqi është një gjueti politike shtrigash.

Në kulmin e saj, Agimi i Artë ishte partia e tretë më popullore në Greqi. Ajo i humbi vendet e saj të mbetura në parlament në zgjedhjet e vitit të kaluar.

/Hashtag.al

Të fundit