“Si duket VMRO-ja është e mobilizuar, qeveri teknike ka që 6 muaj që kërkon. Ndaj mendimin që këto protesta do të japin një vrull mjaftë të fuqishëm në shtator, nga opozita maqedonase. Në këtë rast shtrohet pyetja çfarë bën opozita shqiptare?”
Autore: Xhumadije Ibrahimi
Ngjarjet e fundit në vend që kanë të bëjnë me rastin ‘Zhvatja’ dhe paralajmërimet e opozitës për protesta në shtator, për analistët politik vendin e pret një vjeshtë e nxehtë politike. Ata vlersojnë se e vetmja rrugëdalje është të ndryshohet urgjentisht Ligji për Prokurorinë e Përgjithshme dhe në kuadër të kësaj prokurorie të gjendet zgjidhje për Prokurorinë Speciale.
Duke komentuar zhvillimet e fundit politike në vend, njohësit e këtyre rrethanave vlerësojnë se Maqedonia e Veriut për momentin është në një udhëkryq, si atë të brendshëm por edhe të jashtëm. Rasti ‘Zhvatja’ dhe implikimet që mund të ketë ky rast në skenën politike, për analistin Isak Sherefi, Maqedonisë së Veriut janë duke i kushtuar shumë.
“Maqedonia këto ditë do t’i kalojë edhe ditët më të vështira, për shkak se problemi tashmë është hedhur brenda përbrenda Prokurorisë Speciale. Në të njëjtën vijë është edhe Presidenti Stevo Pendarovski i cili kërkon hetim më të zgjeruar kundër këtyre hetimeve që ndodhën me aferën Zhvatja. Faktikisht, ndaj mendimin se Maqedonisë është duke i kushtuar shumë si në arenën ndërkombëtare por edhe në establishmentin politik brenda përbrenda Maqedonisë së Veriut”, thotë Sherifi.
Nga ana tjetër, analisti Naser Ziberi vlerëson se te qytetarët po humbet shpresa se në Maqedoni mund të vendoset ligji, e drejta të dalë në sipërfaqe dhe të pengohen gjithë ata padrejtësi që në 10 vitet e kaluar ndodhën në RMV. Sipas Ziberit, struktura aktuale e qeverisjes si rezultat i ngjarjeve të fundit po e humb dalëngadalë mbështetjen e qytetarëve.
“Qeveria aktuale mendoj se do ta kalon këtë fazë dhe supozoj se zgjedhjet ardhshme do të jenë ata të rregullat ose me një afat prej tre muaj të parakohshme, sepse vendin e pret anëtarësimi i plotë në NATO, marrja e datës për fillim të negociatave dhe këto duhet të jenë prioritetet e politikës. Por, struktura aktuale e qeverisjes po e humb dalëngadalë mbështetjen e qytetarëve si rezultat e këtyre ngjarjeve e aferave”, thotë Ziberi.
Ndërkohë, Partia më e madhe opozitare maqedonase VMRO –DPMNE kërkon dorëheqje të kryeministrit Zoran Zaev dhe zgjedhje të parakohshme. Njëkohësisht, opozita paralajmëroi se në shtatorë do të fillojë edhe protestat.
Duke u bazuar në këto qëndrime të opozitës, analisti Isak Sherifi thotë se vendin e pret një vjeshtë e nxehtë politike.
“Si duket VMRO-ja është e mobilizuar, qeveri teknike ka që 6 muaj që kërkon. Ndaj mendimin që këto protesta do të japin një vrull mjaftë të fuqishëm në shtator, nga opozita maqedonase. Në këtë rast shtrohet pyetja çfarë bën opozita shqiptare?”, thotë Sherifi.
Sipas tij, VMRO-ja nga kongresi i fundit ka dalë më e fuqishme më e strukturuar dhe më e organizuar. “Prandaj edhe kreu i kësaj partie kërkon qeveri teknike e cila siç ka theksuar ai do të jetë shpëtim për Maqedoninë e veriut në prag të negociatave me Bashkimin Evropian”, shton Sherifi.
Sipas analistit Naser Ziberi, Prokurorja Katica Janeva është dëshpërimi më i madh i kësaj periudhe në vend, pasi sipas tij ajo e vrau shpresën te qytetari se do të vendoset drejtësia. Ai shton se e vetmja rrugëdalje është të ndryshohet urgjentisht Ligji për Prokurorinë e Përgjithshme dhe në kuadër të kësaj prokurorie të gjendet zgjidhje për Prokurorinë Speciale. /KDP