Raporti për progresin e Maqedonisë së Veriut pritet të kalojë në seancën plenare të Parlamentit Evropian me të njëjtën përmbajtje që u miratua në Komitetin për Punë të Jashtme, vlerëson analisti politik Xhelal Neziri.
Në një prononcim për TVM2, Neziri tha se në këtë fazë raporti ka karakter analitik, duke identifikuar sfidat në vend dhe njëkohësisht duke rekomanduar përmbushjen e kushteve që priten nga një vend aspirant për anëtarësim në Bashkimin Evropian.
“Përdorimi i termave ‘identitet’ dhe ‘gjuha maqedonase’ në raport nuk lidhet me ndonjë vendim të Këshillit Evropian, por është pjesë e një dokumenti analitik që nuk besoj se do të përbëjë problem për shtetet që kundërshtojnë. Deputetët nuk kanë të drejtë vetoje në këtë fazë,” tha Neziri.
Sipas tij, me të njëjtin ton raporti pritet të kalojë edhe në Komisionin Evropian, ndërsa sfidat mund të shfaqen në fazën përfundimtare, në Këshillin Evropian, ku vendimet merren me unanimitet nga krerët e 27 vendeve anëtare.
“Kur të vijë koha për të marrë vendime në bazë të këtij raporti – siç është hapja e kapitujve të negociatave – vendimin do ta marrë Këshilli, ku Bullgaria ka të drejtë vetoje. Raporti do të kalojë pa ndryshime, ashtu siç është propozuar nga raportuesi Thomas Waitz, dhe do të shërbejë si nxitje për autoritetet në Shkup që të përmbushin obligimet,” shtoi Neziri.
Ndërkohë, Sofja ka bërë të ditur se nuk do të paraqesë kërkesa të reja ndaj Shkupit, por këmbëngul në respektimin e kushteve ekzistuese që tashmë janë pjesë e kornizës negociuese – përfshirë përfshirjen e bullgarëve në Kushtetutën e Maqedonisë së Veriut.
Institucionet e BE-së vazhdojnë të jenë të përqendruara në zbatimin e kompromisit të arritur në vitin 2022, ndërsa ndryshimet kushtetuese, që kërkojnë një shumicë prej dy të tretash në Kuvend, mbeten kusht kyç për fillimin zyrtar të negociatave të anëtarësimit.