E shtunë, 20 Korrik, 2024

LOJËRAT SPORTIVE RINORE FITOJNË ÇMIMIN DR ERHARD BUSEK “KAMPION I BASHKËPUNIMIT RAJONAL”

Këshilli i Bashkëpunimit Rajonal (RCC) dhe Ministria Federale për Çështjet Evropiane dhe Ndërkombëtare e Austrisë prezantuan Lojërat Sportive Rinore si fitues të Çmimit Dr Erhard Busek “Kampion të Bashkëpunimit Rajonal” në pritjen e organizuar pas Takimit Vjetor të RCC, më 12 qershor, në Shkup, transmeton KDP.MK

Përgatiti: Enis Shaqiri

“Çmimi Dr Erhard Busek “Kampion i Bashkëpunimit Rajonal” është më shumë se thjesht një vlerësim.

Ai mishëron aspiratën tonë kolektive për të ndërtuar një rajon më të fortë, më të integruar, ku qëllimet e përbashkëta dhe mbështetja reciproke hapin rrugën për zhvillim të qëndrueshëm dhe cilësi më të mirë të jetës.

Lojërat Sportive Rinore janë përzgjedhur mes një numri të nominuarve për shkak të angazhimit të tyre të jashtëzakonshëm për të nxitur unitetin në shoqëri, për të kapërcyer kufijtë dhe për të ushqyer një ndjenjë të identitetit të përbashkët mes të rinjve me prejardhje dhe kombësi të ndryshme“, tha Sekretarja e Përgjithshme e RCC, Majlinda Bregu.

Ndryshe, lojërat Sportive Rinore mishërojnë frymën e bashkëpunimit rajonal duke u fokusuar në bashkimin e të rinjve përmes sportit. Për 28 vjet këto lojëra kanë shërbyer si një platformë për nxitjen e miqësive, mirëkuptimit dhe vlerave të përbashkëta mes të rinjve me prejardhje të ndryshme, duke mbledhur fëmijë nga disa vende të rajonit perëndimor dhe duke siguruar që të gjithë ata, pavarësisht nga rrethanat e tyre, të mund të marrin pjesë dhe të përfitojnë përvojën.

Bashkëpunimi rajonal është një shtyllë qendrore e integrimit të rajonit në BE, e cila është një prioritet kyç i politikës së jashtme austriake. Me këtë çmim ne tregojmë mbështetjen tonë për organizatat të cilat – të udhëhequra nga vlerat dhe parimet evropiane – kanë dhënë një kontribut të jashtëzakonshëm, ndërkufitar në promovimin e këtij qëllimi të rëndësishëm të përbashkët dhe për të çuar trashëgiminë e Dr Erhard Busek përpara. Çmimi jo vetëm që njeh arritjet e rëndësishme të Lojërave Sportive Rinore për integrimin rajonal, por do të mbështesë edhe vazhdimin e aktiviteteve të tyre në të ardhmen”, tha përfaqësuesi i Ministrisë së Austrisë për Çështje Evropiane dhe Ndërkombëtare, Thomas Stölzl.

Anëtarët e jurisë, të cilët unanimisht zgjodhën fituesin e këtij viti, ishin: Maja Hanxhiska Trendafilova, Drejtoreshë e ReSPA; Juliana Hoxha Partnerët  e Shqipërisë për Ndryshim dhe Zhvillim; dhe Marko Radovanoviq, Këshilltar Politik në RCC.

Fituesi i Çmimit do të marrë shpërblim financiar në shumën prej 10,000 euro, të sponsorizuar nga Ministria Federale për Çështje Evropiane dhe Ndërkombëtare të Austrisë.

Ne jemi të emocionuar të ndajmë se vlerat dhe rëndësia e projektit tonë, për të cilin të gjithë kemi punuar pa u lodhur, janë pranuar përtej kufijve të vendeve ku zhvillohen Lojërat Sportive Rinore. Kjo njohje është një dëshmi e përpjekjeve dhe përkushtimit tonë kolektiv. Duke filluar nga ky vit, ne organizojmë konkursin dhe të gjitha aktivitetet tona edukative dhe argëtuese në Slloveni. Po planifikojmë të mbledhim 300,000 fëmijë nga Kroacia, Bosnja dhe Hercegovina, Serbia dhe Sllovenia këtë sezon. Çmimi Dr Erhard Busek “Kampion i Bashkëpunimit Rajonal” është një motiv shtesë për të vazhduar promovimin e vlerave që kemi ruajtur në këto 28 vjet, veçanërisht sepse Dr Busek ishte Ambasador i Lojërave Sportive Rinore”, tha Slaven Mariq, Këshilltar i Presidentit të Lojëra Sportive Rinore, i cili mori çmimin në emër të organizatës.

Çmimi Dr Erhard Busek “Kampion i Bashkëpunimit Rajonal”, i nisur në vitin 2013 nga Këshilli i Bashkëpunimit Rajonal, i jepet çdo vit, në bashkëpunim me Ministrinë Federale për Çështjet Evropiane dhe Ndërkombëtare të Austrisë, një individi ose organizate që ka kontribuar veçanërisht në avancimin e bashkëpunimit rajonal në Evropën Juglindore.

Të fundit