Kryeministri i Kosovës, Albin Kurti, ka akuzuar të mërkurën Serbinë se me veprimet e fillimvitit, duke përfshirë arrestimin e qytetarëve nga Kosova dhe rrahjen e politikanëve serbë që mendojnë ndryshe, po vazhdon rrugëtimin drejt metodave të presidentit rus, Vladimir Putin, – përcjell kdp.mk njoftimin e Kohës Ditore.
Në fjalimin e tij para mbledhjes së Qeverisë, Kurti ka thënë se viti ka nisur me lajme të mira për Kosovën, përfshirë liberalizimin, por ka shtuar se përkundër ndryshimeve, edhe sivjet “po tregohet se fqinji i vjetër, po përkeqësohet”.
Ai ka marrë shembull për sjelljen dashakeqe të Serbisë, arrestimin e dy qytetarëve nga Kosova dhe rrahjen e politikanit opozitar serb Nikola Sanduloviq.
“Serbia nuk është rrezik siç shihet e dihet vetëm për qytetarët tanë, sigurinë tonë, stabilitetin rajonal në Ballkan. Ajo së fundmi ka dëshmuar se paraqet rrezik edhe për qytetarët e saj. Sidomos ndaj atyre të cilët kanë guxim të pranojnë se përmes kërkim faljes për gjenocidin e Serbisë në Kosovë ndërtojnë bazë për zhvillimin e marrëdhënieve të mira paqësore e të pajtimit. Kështu është rasti me liderin opozitar serb Nikola Sanduloviç. Shteti serb, përveç që e rrahu, i ngriti aktakuzë për nxitje urrejtje pasi u përkul para varrit të 7 vjeçares Blerina Jashari, e cila u vra nga forcat serbe në vitin 1998”,- ka deklaruar ai.
Kryeministri Kurti i bëri këto komente si përgjigje ndaj arrestimit nga autoritetet serbe të kryetarit të Partisë Republikane në Serbi, Nikola Sanduloviq, nën dyshimin për kryerjen e veprës penale të nxitjes së urrejtjes dhe jo tolerancës kombëtare, racore dhe fetare”. Ai kishte postuar një video të një vizite te varrezat e familjes Jashari në Prekaz të Skenderajt duke vendosur lule dhe kërkuar falje për, siç ka shkruar, “viktimat e pafajshme shqiptare të familjes Jashari”.
Kryeministri Albin Kurti tha se mënyrat, sjelljet dhe veprimet kundër demokratike pasqyrojnë realitetin e hidhur në Serbi.
“E përcjellë në dritën e shkeljeve të drejtave të njeriut dhe çdo zëri opozitar e paqësor, Serbia vazhdon rrugëtimin drejt metodave të Putinit, nga frikësimi deri te torturimi çnjerëzor i kundërshtarëve politikë, në drejtim të kundërt me obligimet në kuadër të marrëveshjes bazike për normalizimin e marrëdhënieve ndërmjet dy vendeve tona”, – citon Zëri i Amerikës Kryeministrin e Kosovës.
Kryeministri Kurti tërhoqi vëmendjen për arrestimin e dy shqiptarëve të Kosovës nga policia serbe me 5 janar derisa ata po udhëtonin përmes Serbisë për në perëndim. Një gjykatë në Beograd i shqiptoi masën e paraburgimit prej 30 ditësh Hasan Dakajt, ish-pjesëtar i Ushtrisë Çlirimtare të Kosovës, nën dyshimet për për krime lufte.
Kryeministri Kurti tha se në fillim të tekstit të marrëveshjes theksohet se palët do të zhvillojnë marrëdhënie të mira fqinjësore bazuar në të drejta të barabarta.
“Serbia me gjithë këtë zgjedh çdo gjë mbi zhvillimin e marrëdhënieve të mira fqinjësore me neve. Ajo në të vërtetë ,zgjedh të sulmojë Kosovën ashtu siç ka bërë me datën 24 shtator të vitit 2023 në Banjskë të Zveçanit e pastaj ta mbrojë nga burgimi kryesin e kësaj vepre terroriste në krye me Milan Radoiçiq” – tha ai.
Sekretari i Jashtëm britanik David Cameron deklaroi të martën se qeveria britanike është e pakënaqur me qëndrimet e Serbisë ndaj Kosovës.
Në një raportim para anëtarëve të Komisionit për Politikë të Jashtme të parlamentit britanik, zoti Cameron, i cili vizitoi Kosovën javën e kaluar, tha se qeveria e tij është e përkushtuar që Serbisë t’i mundësohet integrimi evropian, por shtoi se sulmi i grupit të armatosur serb në pjesën veriore të Kosovës në muajin shtator, një ndër incidentet më të rënda në Kosovë, “paraqiti një rrezik të madh” për sigurinë e rajonit.
Pas sulmit në Banjskë më 24 shtator diplomatët perëndimorë u vunë në përpjekje të reja për të përshpejtuar procesin e normalizimit të marrëdhënieve ndërmjet dy vendeve mes shqetësimeve për qëndrueshmërinë në rajon
Nga Qeveria e Kosovës kërkohet të themelojë Asociacionin e komunave me shumicë serbe, ndërsa Qeverisë së Serbisë të përmbushë detyrimet që çojnë drejt njohjes de fakto të Kosovës.
Beogradi ka theksuar se nuk do të zbatojë asgjë që çon në njohjen e Kosovës.
Bashkimi Evropian edhe gjatë kësaj jave theksoi se marrëveshja është ligjërisht e detyrueshme për të dyja palët dhe se Komisioni Evropian po punon për të bërë ndryshimet në kuadrin e bisedimeve me Serbinë për anëtarësimin e saj në bllok për të përfshirë zbatimin e marrëveshjes me Kosovën.