Manual praktik për gazetarët në konferencë shtypi më kryeministrin aktual (por edhe me pasardhësin, po qe nevoja)
Shkruan: Genc Pollo*
Mbasi pashë në internet video nga pyetje-përgjigjet në konferencën e shtypit të kryeministrit Rama të premten (25 gusht), po shkruaj një shënim me shpresë se mund të jetë i dobishëm për gazetarë profesionistë e kurajozë. Për sot dhe për nesër e pasnesër.
Rama duke theksuar pa mbarim e formalisht me të drejtë përgjegjësisë personale të vartësve të tij (të kapur në keqbërje nga gjyqësori) rrekej në fakt të evitonte përgjegjësinë e vet personale dhe institucionale.
Nëse gazetarët që ndjekin skandalet e fundit kanë mbaruar me pyetjet konkrete dhe duan të fokusohen tek përgjegjësia personale e poltikanëve përgjegjës dhe te pasojat konkrete në vijim të kësaj përgjegjësie personale, atëhere lipset të bëjnë nga një pyetje konkrete, të thjeshtë e të fokusuar e konkrete. Me premisën e sforcuar se Rama ishte nisur për mire, por vetëm muajt fundit po e kuptonte se që nga viti 2014, pas shpinës së tij dhitë qeveritare kishin mësyrë në pemishte.
Disa shembuj më poshtë:
1– Zoti KM! A duhej të ndërhynit ju me auditin tuaj kur për abuzimet e korrupsionin që sot zbardh akuza penale para disa vitesh ngriti alarmin opozita? Ose aksh OJF ? Ose Kontrolli i Lartë i Shtetit?
2-Pse duhej të priste një kryeministër dorëjashtë prangat e akuzat mbi ministrat e tij për të kuptuar se cfarë kishte ndodhur? Dmth për të kuptuar se cfarë kishte firmosur e shkaktuar?
3– Qeveria juaj ka kundërshtuar nismën për pezullimin e sekuestrimin e në rastin e PPP-ve korruptive me shpjegimin se rrezikohej arbitrazhi (për Agon Channel nuk kishit druajtje). Por tani që kjo u bë jo me nismën tuaj por me nismën e një organi jashtë qeverisë a ndjeheni keq? A mendoni që ju thjesht gabuat? Apo ndikuan interesa të caktuara?
4– Ju i keni quajtur inceneratorët “krenaria ime”. A e dinit atë kohë që koncesionari në arrati arkëtonte miliona taksapará dhe nuk ka ndërtuar edhe sot një incenerator si p.sh. në Tiranë?
5– Me njohuritë e sotme do e tërhiqini shprehjen “krenaria ime”?
6– A quani normale që personat të cilët sipas aktakuzës janë të përfshirë dhe me gjasë me përgjegjësi në dy skandalet “inceneratorët” e “sterilizimi” të vazhdojnë të jenë ministra, deputetë në grupin PS dhe drejtorë në kryeminstrinë tuaj?
7– A mos duhet ndonjë lëvizje e ndryshim aty për të ruajtur besimin e publikut tek këto institucione dhe për të mbrojtur nga risku paratë e taksapaguesve shqiptarë dhe europianë?
Po e ndërpres këtu me një gjysëm dyzine pyetje. Gjithkush mund të vazhdojë të shtojë pyetje si t’ja marri mendja. Edhe më e rëndësishme është që këtë ta bëjnë gazetarët. Dhe, që t’ia drejtojnë pyetjet Ramës në mundësinë e parë; nëse do e kenë e kurdo që ta kenë. Edhe pse me gjasë kryeministri do të japë përgjigje pa përgjigje.
*Autori është ish-ministër dhe deputet në Kuvendin e Shqipërisë