Në Kosovë, qytetarë serbë edhe këtë të hënë janë grumbulluar para objekteve komunale në Zveçan, Zubin Potok dhe Leposaviq, ku më 26 maj Policia e Kosovës hyri me forcë për të instaluar kryetarët e rinj shqiptarë. Qëllimi iI tubimit ishte pengimi i kryetarëve që të hyjnë në zyrat e veta.
Sikurse njofton koha.net, policia e Kosovës njoftoi se po e menaxhon situatën e krijuar nga protestat e serbëve në veri, ndërsa tha se protestuesit kanë shfaqur dhunë. Në një njoftim për media, Policia e Kosovës tha se në Leposaviq, Zbin Potok dhe në Zveçan, po zhvillohen protesta të serbëve lokalë, ndërkohë që në Zveçan ka pasur përpjekje për kalimin e kordonit të sigurisë për të hyrë me forcë në objektin e komunës, – përcjell kdp.mk.
Dy krerët e Listës Serbe, Goran Rakiq dhe Sllavko Simiq kanë shtruar dy kërkesa për largimin e protestuesve nga objekti i Komunës së Zveçanit, ku janë mbledhur për të protestuar.
“Kërkesat tona janë që sherifët – siç e quajnë veten – të paligjshëm, të shkojnë në shtëpitë e tyre dhe t’i udhëheqin të afërmit e tyre. Dhe, të gjitha njësitë speciale në ndërtesën e komunës, përreth komunës, të tërhiqen në jug, sepse ky nuk është stacion policie, është bashki e qytetit,” – tha kryetari i Listës Serbe, Goran Rakiq, duke folur nga Zveçani.
Nga ana tjetër, komandanti i KFOR-it ka njoftuar se një kordon i kësaj force po qëndron në këtë zonë, teksa ka paralajmëruar se nëse protestuesit nuk largohen do të ketë edhe të shtëna.
Një prani e shtuar e ushtarëve të KFOR-it gjendet para objekteve të komunave të Mitrovicës së Veriut, Leposaviqit, Zveçanit e Zubin-Potokut.
Janë vendosur edhe rrethoja me tela përgjatë perimetrit të objekteve të komunave.
Përfaqësuesit e Listës Serbe biseduan me pjesëtarë të Policisë së Kosovës. Ata u kërkuan ta lirojnë Komunën e Leposaviqit në mënyrë që “punonjësit të kthehen në komuna”.
Në Zubin-Potok shtatë autoblinda të KFOR-it kanë ardhur para objektit të Komunës. Disa pjesëtarë të KFOR-it janë futur brenda objektit.
E Policia e Kosovës raportohet se ka hedhur gaz lotsjellës në drejtim të turmës së grumbulluar para Komunës së Zveçanit.
Kryeministri Kurti bisedon me Josep Borrellin
Kryeministri i Kosovës, Albin Kurti, njoftoi në orët e mesnatës se ka zhvilluar një bisedë telefonike me përfaqësuesin e Lartë të Bashkimit Evropian për Politikë të Jashtme, Josep Borrell.
Ai shkroi në Twitter se kanë biseduar me çështjet aktuale, përfshirë edhe procesin paszgjedhor në komunat veriore. Sipas Kurtit, kryetarët e zgjedhur në veri “do të ofrojnë shërbime për të gjithë qytetarët”.
“Është e rëndësishme të intensifikohet dialogu për zbatimin e plotë të Marrëveshjes Themelore”,- ka shkruar kryeministri Kosovar.
Reagimet e Beogradit
Ministri i Punëve të Jashtme i Serbisë, Ivica Daçiq, tha se detyrë e KFOR-it është “t’i pamundësojë aktet e njëanshme të Prishtinës”, e “jo t’i pengojë punonjësit të hyjnë në ndërtesat [komunale]”.
“Tani po i ruajnë kryetarët me pretekstin e ruajtjes së paqes. Duket se po i ruajnë nga pronarët e objekteve, serbët, nga ata që punojnë atje, që janë të punësuar atje. Nuk mund të jenë kryetarë në komunat serbe, ku serbët nuk i kanë zgjedhur”, – tha Daçiq për Radio-Televizionin e Serbisë. Ai shtoi se forcat e armatosura të Serbisë janë në gjendje gatishmërie.
Thirrje e ndërkombëtarëve
Ambasadorët e vendeve më të industrializuara QUINT, në Kosovë, ku bëjnë pjesë Shtetet e Bashkuara të Amerikës, Gjermania, Franca, Italia dhe Mbretëria e Bashkuar i janë drejtuar me një thirrje autoriteteve të Kosovës të mos ndërmarrin asnjë masë të re për hyrjen me forcë në ndërtesat e komunave veriore të banuara me shumicë serbe. Paralajmërimi, njofton, DW, është i qartë:
“Veprimet e reja të njëanshme do të ndikojnë negativisht në marrëdhëniet me vendet e QUINT-it dhe Bashkimit Evropian. QUINT dënon vendimin e Kosovës për të hyrë me forcë në ndërtesat komunale në veri të Kosovës, pavarësisht thirrjeve tona të vazhdueshme për përmbajtje. Në këtë kontekst, QUINT dhe Bashkimi Evropian presin që autoritetet e qeverisë së Kosovës të mos ndërmarrin asnjë masë të re për hyrje me forcë në ndërtesat komunale në Leposaviq, Zubin Potok dhe Zveçan.”
Deklarata e përbashkët, po ashtu, thekson se “kryetarët e zgjedhur duhet gjithashtu të tregojnë përmbajtje dhe të ndërmarrin veprime të menjëhershme për të demonstruar përkushtimin dhe përgjegjësinë e tyre për të përfaqësuar dhe shërbyer të gjithë pjesëtarët e komuniteteve të tyre”, – nënvizohet në reagimin e QUINT-it në të cilin njëherësh palët e implikuara paralajmërohen fuqimisht që të mos ndërmarrin “kërcënime ose veprime të tjera që mund të ndikojnë në një mjedis të sigurt, duke përfshirë lirinë e lëvizjes dhe që mund të nxisin tensionet ose konflikt”.