Të dyja kompanitë në Mainz dhe New York njoftuan se pjesëmarrësit në studimin e kishin toleruar mirë vaksinën. Efektet anësore janë të krahasueshme me ato në moshat 16-25 vjeç. Vaksina e Biontech/ Pfizer deri tani është aprovuar për njerëzit e moshës 16 vjeç e lart.
Sipas deklaratave të tyre, Biontech dhe Pfizer planifikojnë t’i paraqesin të dhënat në javët e ardhshme në Administratën e Ushqimit dhe Medikamenteve në SHBA dhe në Agjencinë Evropiane të Medikamenteve (EMA), “në mënyrë që të jenë në gjendje të zgjerojnë aplikimin për të rinjtë e moshës 12 deri në 15 vjeç, sa më herët që të jetë e mundur “. Të gjithë pjesëmarrësit në studim do të monitorohen për mbrojtje dhe siguri afatgjatë për dy vjet shtesë, pas marrjes së dozës së dytë.
“Lejimi i fëmijëve që të kthehen në jetën normale shkollore dhe të takojnë familjen dhe miqtë është shumë i rëndësishëm. Në të njëjtën kohë, megjithatë, ne duhet t’i mbrojmë ata dhe të afërmit e tyre”, deklaroi Ugur Sahin, themelues i Biontech-ut.
“Shpresojmë që më pas të fillojmë vaksinimin e kësaj grupmoshe përpara fillimit të vitit të ardhshëm shkollor,” tha shefi i Pfizer Albert Bourla, sipas njoftimit. Deri tani, ka pasur vetëm miratim të kushtëzuar në BE për personat e moshës 16 vjeç e lart.
Përveç kësaj, studimet kanë treguar se minorenët e vaksinuar zhvillojnë një përgjigje shumë të qartë me antitrupa.
Disa ditë më parë, Biontech dhe Pfizer njoftuan se kishin filluar studime edhe për fëmijë më të vegjël (nga gjashtë muaj deri në moshën 11 vjeç). “Rezultatet e para të studimit tek minorenët tregojnë se fëmijët janë veçanërisht të mbrojtur mirë nga vaksinimi,” tha më tej shefi i Biontechut, Ugur Sahin. Sipas Biontech dhe Pfizer, pjesëmarrësit midis moshës pesë dhe njëmbëdhjetë vjeç e morën dozën e parë të vaksinës javën e kaluar.
Ndërkohë, VOA raporton se Kompanitë Pfizer dhe BioNTech thanë se vaksina e tyre për koronavirusin është rreth 91% e efektshme në parandalimin e sëmundjes, duke cituar të dhëna të reja nga provat që përfshinin pjesëmarrës të imunizuar në një periudhë që zgjatej deri në 6 muaj.
Vaksina ishte gjithashtu 100% e efektshme në parandalimin e sëmundjes midis pjesëmarrësve në Afrikën e Jugut, ku një variant i ri i quajtur B1351 është dominues, megjithëse numri i këtyre pjesëmarrësve ishte relativisht i vogël.
Ndonëse shkalla e re e përgjithshme e efikasitetit prej 91.3% është më e ulët se 95% e raportuar fillimisht në nëntor për provat me 44,000 pjesëmarrës, që nga ajo kohë në botë janë përhapur një numër variantesh të reja të koronavirusit.
Shefi ekzekutiv i Pfizerit Albert Bourla tha se rezultatet e reja, që përfshijnë të dhëna për më shumë se 12,000 njerëz të vaksinuar plotësisht për të paktën gjashtë muaj, u japin mundësi dy firmave prodhuese që t’ia paraqesin vaksinën për miratim të plotë entit rregullator të SHBA.
Aktualisht vaksina është e autorizuar për përdorim emergjent nga Administrata amerikane e Ushqimit dhe e Barnave.
Të dhënat e reja “ofrojnë rezultatet e para klinike që një vaksinë mund të mbrojë njerëzit në mënyrë efektive nga variantet që qarkullojnë aktualisht, një faktor me rëndësi të madhe për të arritur imunitetin e tufës dhe për t’i dhënë fund kësaj pandemie për popullatën globale”, tha në një deklaratë Ugur Sahin, drejtor ekzekutiv i kompanisë BioNTech.
Ekspertët shqetësohen se variante të reja të COVID-19 nga Afrika e Jugut dhe Brazili mund të jenë rezistente ndaj vaksinave ekzistuese. Më shumë se 300 raste me variantin e Afrikës së Jugut janë zbuluar në mëse 25 shtete amerikane, sipas zyrtarëve.