Një nga manovrat e shumta që po luan Edi Rama pas dështimit për të hapur ngociatat e Shqipërisë në 18 tetor, është edhe ajo për t’u futur si pykë në një kundërvënie mes SHBA-së dhe BE-së. Kryeministi shqiptar e ka përforcuar sot këtë ide gjatë një konference, “Shtetet e Bashkuara të Amerikës në Ballkanin Perëndimor”, të mbajtur në Tiranë. Në një pjesë të mirë të fjalës, gati 20 minutështe, të shefit të qeverisë, u theksua dualizmi në rritje mes politikave të Uashingtonit dhe Brukselit.
Ndërsa SHBA po e rrit vëmendjen dhe angazhimin në rajonin tonë, duke caktuar përfaqësues të saj si diplomatin e DASH, Palmer, po ashtu edhe ambasadorin Grenell për dialogun Kosovë- Serbi, BE po e humbet peshën e saj sepse sipas tij, nuk e mban fjalën.
Për të ilustruar këtë pafuqi të BE-së, Rama përmendi dy shembuj: Së pari mosdakordësinë mes vendeve anëtare për t’i hapur dritën jeshile Shqipërisë dhe Maqedonisë, pasi komisioni Europian u shpreh pozitivisht për to dhe së dyti mosmbajtjen e premtimit për të liberalizuar vizat e kosovarëve pasi të miratohej marrëveshja e demarkacionit me Malin e Zi. BE e hëngri fjalën, megjithëse ajo u liberalizoi vizat miliona qytetarëve të vendeve të tjera, theksoi ai.
Ndonëse kryeministri shqiptar nënvizoi se destinacioni ynë final mbetet BE, ai e konceptoi fjalën e tij në theksimin e kësaj antiteze SHBA- BE. Njëra arsye për këtë mund të jetë thjeshtë pragmatike, për të hedhur vetëm te Europa mossuksesin e Shqipërisë. Por një objektiv më i largët mund të jetë edhe një presion i butë lidhur me tezën më të përfolur, atë të një marrëveshjeje me ndryshim kufijsh mes Prishtinës dhe Beogradit.
Dihet se megjithëse ka ndryshuar qëndrim së fundi, Rama ka qenë pjesë e planit Thaçi- Vuçiç. Por ky projekt, që u duk sikur i rreshtoi europianët në neutralë ose kundër, e kishte gjithë shpresën të përkrahej nga administrata Trump. Prandaj duke theksuar se Bashkimi Europian dhe sidomos Gjermania nuk mund të përdorë kërbaçin pa dhënë kulaçin, kyeministri u bën një presion të tërthortë kundërshtarëve të kësaj ideje. Këtu ai rreshtohet me një sërë diplomatësh dhe analistësh të shumtë që pretendojnë se duke ndërprerë perspektivën e zgjerimit ndaj vendeve të Ballkanit, BE nuk ka asnjë mundësi ta detyrojë Serbinë për një marrëveshje (Shiko paragrafin poshte). Sllogani i deritanishëm ka qenë: Zgjidhni problemin me Kosovën, njiheni atë, që t’u hapet një ditë drita e antarësimit. Duke e fikur këtë shpresë, Beogradi nuk do kishte asnjë shtysë për ta zgjidhur problemin.
Dhe prandaj Rama godet nën brez me tezën e tij: “Po nuk na hapët negociatat ne, ju shuani shpresat për gjithë Ballkanin Perendimor. Ju i thoni dhe Malit të zi dhe Serbisë, se s’do të hynë kurrë në Europë e në këtë mënyrë ju humbni peshën tuaj për t’i shtyrë vendet tona drejt marrëveshjeve, sidomos asaj Kosovë- Serbi”.
Pikërisht, kjo mund të jetë arsyeja pse ai po thekson gjithnjë e më shumë diferencën mes një SHBA-je prezente dhe të interesuar dhe një BE-je me pozita më të pafavorshme dhe më të dobët.
©Lapsi.al
Rama për BE:
“Nuk them ndonjë gjë të paditur nëse theksoj që pas vendimit të KE në 18 tetor, pozicioni i BE në këtë konflikt është dobësuar tej mase dhe kapaciteti i BE për të ndikuar në procesin e dialogut është tkurrur tej mase, sepse BE me vendimin e marrë i dha një goditje jo të vogël besueshmërisë së vet dhe do të jetë e vështirë për të dyja palët që të besojnë në mundësinë e incentivave që mund të deklarohen, por faktikisht mund të mos mbahen“.