Politikani dhe shkrimtari serb Vuk Drashkoviq ka deklaruar se vendimi i Këshillit Evropian që Maqedonisë së Veriut dhe Shqipërisë të mos i jepet data për nisjen e negociatave të anëtarësimit ka dëshmuar se Bashkimi Evropian është një partner i pasigurt. Ai ka shprehur shpresën se NATO-ja nuk ka për të ndjekur këtë shembull. Duke folur për Televizionin shtetëror të Malit të Zi, ish-ministri i Jashtëm i federatës serbo-malazeze ka vlerësuar vendimi negativ nga Brukseli e fut Maqedoninë në një krizë të re.
Vuk Drashkoviq, ish-ministri i Jashtëm nga koha kur Serbia e Mali i Zi përbënin një federatë, ka ka kritikuar vendimin e Bashkimit Evropian që Shkupit e Tiranës zyrtare të mos i jepet data për çeljen e negociatave. Drashkoviq i tha televizionit malazez se shpreson se NATO-ja nuk ka për t’i gjasuar BE-së, në të kundërtën – ai parashikon që kaosi të mbërthejë rajonin: ‘Bashkimi Evropian u tregua si një partner i pasigurt dhe si mashtrues! Ky është një vendim i rrezikshëm. Na mbetet vetëm shpresa se NATO-ja nuk ka për t’i gjasuar Bashkimit Evropian, në të kundërtën këtu në Ballkanin Perendimor do të kishim shumë shpejt një kaos e mbase edhe luftë, ’- tha Drashkoviq duke nënvizuar se ky vendim i hap shtegun ndikimit rus, turk e kinez në rajonin për të cilin si shkrimtar shprehet se ‘është i talentuar për fatkeqësi’.
Duke komentuar vendimin e kryeministrit të Maqedonisë së Veriut për të shkuar në zgjedhje të parakohshme pikëisht për shkak të mosmarrjes së datës për çeljen e negociatave për aderim në Bashkimin Evropian, ish-kryediplomati i Beogradit parashikon ditë të vështira për vendin. Thotë se Maqedonia e Veriut është në rrezik të madh: ‘Unë mendoj se Zaev ndërmori një hap mëse të rrezikshëm për shkak se njerëzit të cilët në zgjedhjet e kaluara votuan me entuziazëm dhe shpresë për Evropën tani do të jenë të zhgënjyer dhe një numër i madh i tyre as që do të dalë në zgjedhje. Nga ana tjetër, ajo VMRO-ja, të gjithë ata të cilët janë për urrejtje, pastaj agjenturat ruse, ata do të marrin krahë. Vetëm se mund të imagjinoj tani se çfarë vrulli do të marrin ato forca të cilat dëshirojnë që nga Ballkani të bëjnë një Siri në interes të tyre strategjik dhe kështu pas Sirisë të përfundojmë si Venezuela,’ – ttransmeton TV Klan Macedonia deklaratën e Drashkoviqit për televizionin shtetëror malalez.
Në këtë shtrirje ish-kryediplomati serbo-malazez nuk është optimist për fillimin së shpejti të negociatave Kosovë-Serbi. Përse?
‘Për shkak se nuk lejon Rusia. Shprehimisht duhet thënë të vërtetën. Vjen kryeministri rus Medvedev, këto ditë, dhe e din se nuk e thotë të vërtetën. Thotë: Rusia vazhdon të ruajë tërësinë tokësore e sovranitetin e Serbisë mbi Kosovën.’