Një rrjet ombrellë i organizatave të ndihmës palestineze njoftoi të premten se vetëm 119 kamionë me ndihma kishin hyrë në Rripin e Gazës që nga lehtësimi i bllokadës nga ana e Izraelit të hënën, ndërsa akuzoi ushtrinë izraelite për vendosjen e pengesave të panevojshme dhe për shpalljen e katër të pestave të territorit si zonë ushtarake të ndaluar për civilët, përcjell KDP.
Rrjeti deklaroi se shpërndarja e ndihmave po pengohet nga grabitje të grupeve të armatosura pranë qytetit Khan Younis, duke theksuar se “ushqimet e destinuara për fëmijët dhe familjet që përballen me uri ekstreme janë vjedhur”.
Në një deklaratë, rrjeti dënoi gjithashtu sulmet ajrore izraelite mbi ekipet e sigurisë që po shoqëronin karvanët e ndihmës. Një zyrtar i Hamasit tha se gjashtë pjesëtarë të një ekipi sigurie janë vrarë gjatë një sulmi të tillë. Ushtria izraelite nuk dha asnjë koment të menjëhershëm.
Organizatat e ndihmës vlerësojnë se mbi 9,000 kamionë janë gati për të hyrë në Rrip, por lejohet vetëm një pjesë shumë e kufizuar e tyre dhe furnizimet përfshijnë një gamë të ngushtë produktesh. Ato e cilësuan marrëveshjen e Izraelit për lejimin e kamionëve si një “manovër mashtruese” për të shmangur presionin ndërkombëtar për heqjen e bllokadës.
Situata humanitare në Gaza mbetet kritike pas muajsh luftimesh, me Kombet e Bashkuara që paralajmërojnë për uri masive dhe mungesë të theksuar ndihmash.