Një kandidat nacionalist i krahut të djathtë që është kundër ofrimit të ndihmës ushtarake për Ukrainën dhe skeptik për BE-në ka arritur një fitore të fortë në raundin e parë të zgjedhjeve presidenciale në Rumani.
George Simion doli i pari me mbi 40 për qind të votave dhe do të garojë në balotazhin e 18 majit si favorit kundër kryebashkiakut liberal të Bukureshtit.
Nicusor Dan mundi me një diferencë të ngushtë Crin Antoneskun, një kandidat i koalicionit qeverisës, me rreth 21 për qind të votave.
Gjashtë muaj më parë, zgjedhjet presidenciale të Rumanisë përfunduan në skandal dhe konfuzion. Ato u fituan nga kandidati radikal Calin Georgescu, por fitorja e tij u anulua nën dyshimin e shkeljes së ligjeve elektorale dhe ndërhyrjes ruse.
Pasi qendrat e votimit u mbyllën mbrëmjen e së dielës, Simion falënderoi ata që votuan për të. “Ishte një akt kuraje, besimi dhe solidariteti”, tha ai në një mesazh të regjistruar.
“Këto zgjedhje nuk janë për një kandidat apo një tjetër, por për çdo qytetar rumun që është mashtruar, injoruar, poshtëruar dhe që ka ende forcë për të besuar dhe mbrojtur identitetin dhe të drejtat tona”, tha Simion.
Mbështetja për të ishte e fortë tek diaspora rumune. Ai siguroi mbi 70 për qind të votave nga rumunët që jetojnë në Itali, Spanjë dhe Gjermani.
38-vjecari është gjithashtu një admirues i presidentit Donald Trump dhe thotë se dëshiron një BE të përbërë nga vende të forta dhe sovrane./https://euronews.al