Koalicioni opozitar shqiptar “VLEN” pritet të transformohet në një parti të re politike, deklaroi zëvendëskryeministri i parë dhe lideri i Lëvizjes Demokratike, Izet Mexhiti. Ai tha se procedurat për themelimin e subjektit të ri do të nisin javën e ardhshme, përcjell kdp.mk.
Në një intervistë për emisionin “PodGo” në Telegrafi Maqedoni, Mexhiti tha se partia e re do të ketë një seli të përbashkët, qendër informative, program, si dhe lista të përbashkëta për këshilltarë dhe kandidatë për zgjedhjet lokale. Sipas tij, ende nuk është përcaktuar as emri i liderit të kësaj strukture të re.
“Nuk ka rëndësi kush do të jetë kryetar. Rëndësi ka të bashkohemi dhe të organizohemi mirë për zgjedhjet lokale,” tha Mexhiti. Ai shtoi se nuk e konsideron veten lider të VLEN-it, por përkrah një koncept që synon të mobilizojë elektoratin shqiptar.
Vendimi i Aleancës për Shqiptarët, e udhëhequr nga Arben Taravari, për të garuar me lista të veta në zgjedhjet lokale ka krijuar tensione brenda koalicionit. Kryesia qendrore e partisë vendosi më 15 prill në Tetovë që të veprojë në mënyrë të pavarur, megjithëse Taravari deklaroi se kjo nuk nënkupton largim nga qeveria apo koalicioni VLEN.
Mexhiti, megjithatë, më 16 prill vlerësoi se Aleanca de facto është përjashtuar nga koalicioni, duke theksuar se ky hap shkon në favor të opozitës së udhëhequr nga BDI. Ai tha se ende nuk është marrë vendim nëse do të kërkohet shkarkimi i Taravarit nga posti i ministrit të Shëndetësisë.
Analisti politik Besim Nebiu tha për Televizionin Telma se largimi i Taravarit krijon një realitet të ri politik. “Para këtij vendimi, VLEN kishte epërsi të qartë në zgjedhjet lokale. Tani situata ndryshon dhe gara bëhet më e pasigurt,” tha ai.
Sipas tij, ndarja mund të ndikojë edhe në funksionimin e shumicës parlamentare, pasi pesë deputetë të VLEN-it janë nga Aleanca. “Tashmë nuk kemi një, por dy subjekte shqiptare brenda koalicionit qeverisës me VMRO-DPMNE. Pres që pjesa tjetër e VLEN-it të konsolidohet në një strukturë më të fortë,” shtoi Nebiu.
Ai tha se mbetet të shihet nëse kryeministri Hristijan Mickoski do të mbajë të njëjtin qëndrim ndaj Aleancës apo do ta mbështesë projektin e ri politik të Mexhitit. Deri më tani, Mickoski nuk ka komentuar publikisht mbi zhvillimet.
Mexhiti deklaroi se një bashkëpunim i mundshëm me Taravarin në zgjedhjet lokale nuk është opsion.
Ndërkohë, lideri i BDI-së, Ali Ahmeti, tha se Taravari e ka kuptuar se pozitat e shqiptarëve në qeveri ishin “poshtëruese”. Ai konfirmoi se kanë pasur kontakt telefonik dhe vlerësoi se Taravari “ka kuptuar se shqiptarët luajnë rolin e shërbëtorëve në pushtet”.
Në një intervistë për emisionin “Stadion”, Taravari tha se nuk sheh hapësirë për bashkëpunim me VLEN dhe konfirmoi kontaktet me Ahmetin. Ai nuk përjashtoi mundësinë e bashkëpunimit me BDI-në në raundin e dytë të zgjedhjeve. “Nuk jemi të lindur në pushtet. Nëse duan të mbetemi – mirë, nëse jo – shkojmë në opozitë. Varet nga kryeministri,” deklaroi Taravari.
Një takim mes Mickoskit dhe përfaqësuesve të VLEN-it dhe Aleancës pritet në ditët në vijim, për të sqaruar nëse dhe si kriza në bllokun politik shqiptar do të ndikojë në funksionimin e koalicionit qeveritar.
Ndërkohë, kryetari i Kuvendit, Afrim Gashi, mohoi të ketë plane për t’u larguar nga VLEN, duke deklaruar përmes një postimi se mbetet besnik ndaj votuesve që e kanë mandatuar. “Përfaqësoj Alternativën dhe angazhohem të jem i paanshëm në ushtrimin e funksionit tim si kryetar Kuvendi,” tha ai, duke hedhur poshtë spekulimet për afrime të mundshme me BDI-në.