Policia e Kosovës të hënën ka mbyllur nëntë degë të Postës së Serbisë në komunat veriore të Kosovës, që kishin vepruar ilegalisht. Policia ka thënë se informatat i ka marrë nga ARKEP-i. Në Mitrovicë të Veriut dhe Leposaviq janë mbyllur nga tri objekte, në Zveçan dy, dhe një në Zubin Potok. Dhe, ndërsa autoritetet qendrore në Prishtinë kanë mbrojtur vendimin, ky hap i Qeverisë së Kosovës është kritikuar nga Bashkimi Evropian dhe Shtetet e Bashkuara të Amerikës, – përcjell kdp.mk njoftimet e medias në Prishtinë.
SHBA-ja ka shprehur zhgënjimin e thellë ndaj Qeverisë së Kosovës lidhur me mbylljen e degëve të Postës së Serbisë në veri të Kosovës, dukje e cilësuar këtë si vendim të njëanshëm dhe të pakoordinuar.
“Qeveria e SHBA-së është thellësisht e zhgënjyer nga veprimet e njëanshme dhe të pakoordinuara të Qeverisë së Kosovës kundër filialeve të postës serbe në veri të Kosovës. Veprimet e pakoordinuara të Kosovës vënë qytetarët kosovarë dhe ushtarëat e KFOR-it në rrezik më të madh, përshkallëzojnë në mënyrë të panevojshme tensionet rajonale dhe minojnë reputacionin e Kosovës si partnere e besueshme ndërkombëtare”, thuhet në komunikatën e Ambasadës së SHBA-së në Kosovë.
SHBA-ja i ka bërë thirrje Qeverisë së Kosovës që t’i ndërpresë veprimet e mëtutjeshme “të njënashme dhe t’i kthehet angazhimit konstruktiv në dialogun e lehtësuar nga BE-ja për t’i zgjidhur çështjet që kanë të bëjnë me normalizimin e marrëdhënieve ndërmjet Kosovës dhe Serbisë”.
Bashkimi Evropian e konsideron mbylljen e nëntë pikave të Postës së Serbisë në veri të Kosovës nga autoritetet kosovare si “veprim i njëanshëm dhe i pakoordinuar”, ka thënë zëdhënësi i BE-së, Peter Stano.
Sipas tij, ky veprim është shkelje e marrëveshjeve të arritura në dialogun e ndërmjetësuar nga BE-ja.
“Bashkimi Evropian e konsideron mbylljen e sotme të nëntë degëve të Postës së Serbisë në veri të Kosovës nga autoritetet e Kosovës si veprim i njëanshëm dhe i pakoordinuar, që shkel marrëveshjet e arritura nën dialogun e lehtësuar nga BE-ja. Si pjesë e marrëveshjeve sa i përket Telekomunikacionet të arritura në vitin 2013 dhe Planit të Veprimit të rënë dakord më 2015, të dyja palët ranë dakord të diskutojnë për shërbimet postare ‘në një fazë të mëvonshme’, duke pranuar kështu që çështja mund të trajtohet brenda kornizës së dialogut”, ka thënë Stano.
Stano ka thënë se këtë e ka pranuar edhe Autoriteti Rregullativ i Shërbimeve Elektronike dhe Postare i Kosovës.
Stano ka thënë se BE-ja është e gatshme ta përfshijë këtë çështje në agjendën e takimit të ardhshëm në dialog.
“BE-ja pret që palët të zhvillojnë ide konstruktive që mund t’u shërbejnë si bazë për zgjidhje. Veprimet e njëanshme dhe të pakoordinuar nuk mund të ofrojnë zgjidhje për këtë apo ndonjë çështje tjetër që i përket procesit të normalizimit mes Kosovës dhe Serbisë. Mbyllja e shërbimeve ekzistuese të serbëve të Kosovës, pa një marrëveshje të re të rënë dakord paraprakisht, do të ndikojë negativisht në jetën e përditshme të tyre dhe kushtet e jetesës për këtë komunitet. I bëjmë thirrje Qeverisë së Kosovës të rishqyrtojë vendimin e saj dhe të gjejë një zgjidhje të negociuar për këtë çështje në kuadër të dialogut të lehtësuar nga BE-ja”, ka thënë Stano.
Policia e Kosovës të hënën ka mbyllur nëntë degë të Postës së Serbisë në komunat veriore të Kosovës, që kishin vepruar ilegalisht. Policia ka thënë se informatat i ka marrë nga ARKEP-i. Në Mitrovicë të Veriut dhe Leposaviq janë mbyllur nga tri objekte, në Zveçan dy, dhe një në Zubin Potok.
Reagimi i Ramush Haradinajt, kryetar i AAK-së
“Vendimet e njëanshme e të pakoordinuara të Albin Kurtit me aleatët, janë shkatërrimtare për Kosovën. Përpara se Albin Kurti ta “vrasë” dinarin serb në Kosovë, atë e ka vrarë Euro. Politika e tij populiste që mund të rrezikojë edhe jetët e pjesëtarëve të NATO-s, është sabotim e përpjekje për zhbërjen e shtetit.
Ky kryeministër është futur thellë në agjendën e Serbisë e cila për t’i demonizuar shqiptarët i ka vrarë edhe fëmijët e vet në Panda të Pejës. Po dyshoj nëse ky person, si shqiptari i vetëm i liruar nga burgu me dekret të Presidentit serb, Koshtunica, është duke i kryer obligimet që i ka marrë. Por, ia kujtoj atij e gjithë të tjerëve se Kosova ka zot dhe nuk ka qeveri të mund ta kthej mbrapa!”