VMRO DPMNE-ja dhe koalicioni i katër partive politike shqiptare, VLEN, thonë se kanë përfunduar bisedimet për bashkëqeverisje dhe për ndarjen e posteve ministrore në Qeverinë e re të Maqedonisë së Veriut, por marrëveshja nuk do të bëhet e ditur pa mbylljen e bisedimeve edhe me lëvizjen ZNAM, një parti që pritet gjithashtu të jetë pjesë e ekzekutivit të ardhshëm, shkruan Radio Evropa e Lirë, transmeton KDP.MK.
Bazuar në prononcimet e zyrtarëve të VMRO DPMNE-së, marrëveshja do të bëhet e ditur pas konstituimit të Kuvendit të ri, më 28 maj. Pas mbledhjes së Kuvendit, kryetari i VMRO-së, Hristijan Mickovski, në afat prej 10 ditësh duhet të marrë mandatin për formimin e Qeverisë së re nga presidentja e shtetit, Gordana Silanovska-Davkova.
“Bisedimet janë në një fazë të avancuar, por ende nuk kemi marrëveshje finale dhe derisa nuk e kemi një gjë të tillë, nuk do të mund të japim detaje. Bisedimet po zhvillohen për të gjitha çështjet, ndarjen e resorëve, por mbi të gjitha, për kuadrot që duhet të jenë të pranueshëm dhe të gatshëm të punojnë mbi parimet bazë të punës së Qeverisë së re”, ka deklaruar zëdhënësi i VMRO DPMNE-së, Naum Stoilkovski.
Detaje nuk kanë dhënë as partitë politike shqiptare duke ia lënë këtë kryetarit të VMRO DPMNE-së, Hristijan Mickovski.
Jozyrtarisht bëhet e ditur nga koalicioni VLEN, se partneri shqiptar në Qeverinë e ardhshme do të drejtoj Ministrinë e Mjedisit dhe Planifikimit Hapësinor, Ministrinë e Shëndetësisë, Ministrinë për Punë dhe Politikë sociale, një ministër pa portofol, si dhe një zëvendëskryeministër. Pjesë e bisedimeve është edhe Sekretariati për Çështjeve Evropiane.
VLEN, siç bëhet e ditur, do të ketë edhe gjashtë zëvendësministra në Ministrinë e Arsimit, atë të Punëve të Brendshme dhe të Mbrojtjes.
Arben Taravari nga koalicioni VLEN nuk i ka hedhur poshtë këto të dhëna që tashmë përmenden në media dhe në opinionin e gjerë.
“Mund të them se 95 për qind e zgjidhjeve kadrovike, për të cilat kemi rënë dakord tanimë, janë rrotulluar (raportuar) nëpër media. Besoj se këtyre ditëve do të bëhen publike pasi ajo [VMRO DPMNE-ja] synon të ketë mbi 80 vota në shumicën e re qeveritare, kështu që fjala përfundimtare është te mandatari i ardhshëm”, ka thënë Taravari.
Në rast se bisedimet mbyllen me sukses, këto tri subjekte politike do të kenë një shumicë parlamentare prej 78 deputetësh, por VMRO DPMNE-ja synon numrin prej 83 deputetëve apo dy të tretat për t’i miratuar ligjet që kërkojnë këtë shumicë të votave.
Partitë shqiptare, bazuar në prononcimet e tyre, si dhe sipas burimeve të televizionit Alfa, do të udhëheqin edhe me Kuvendin e Maqedonisë së Veriut që pritet të konstituohet të martën, më 28 maj.
Në këtë pozitë pritet të emërohet Afrim Gashi nga parti Alternativa, që është pjesë e koalicionit VLEN.
Gashi në një prononcim për mediat nuk e ka përgënjeshtruar lajmin duke thënë se “me rëndësi është që shqiptarët do të vazhdojnë të kryejnë një nga tri funksionet më të rëndësishme në shtet”, që nënkupton se kryetar i Kuvendit do të zgjidhet një shqiptar.
Me një koalicion të tillë qeveritar, mandatari Hristijan Mickoski do të ketë një shumicë prej dy të tretash të deputetëve në Kuvend, aq sa është e nevojshme për të kryer riorganizimin që ishte paralajmëruar në programin parazgjedhor Platforma 1198.
VMRO-DPMNE synon të krijojë dy ministri të reja, për energjetikë, miniera dhe burime minerale, një ministri për sport, ku do të hyjnë të gjitha institucionet shtetërore që merren me këto departamente. Është planifikuar edhe një ndarje e Ministrisë së Punës dhe Politikës Sociale, departamenti i turizmit nga Ministria e Ekonomisë shkon në Ministrinë e Kulturës.
Bazuar në paralajmërimet e VMRO DPMNE-së, Qeveria e re e Maqedonisë së Veriut pritet të zgjidhet më së voni deri më 20 qershor.