Edhe pse u betua se “do të respektojë Kushtetutën dhe ligjet”, ajo veproi në kundërshtim me këtë që në dhënien e betimit.
Gordana Siljanovska-Dafkova nuk përmendi emrin e ri të shtetit “Republika Maqedonia e Veriut” gjatë përsëritjes së tekstit të betimit, që paraprakisht e lexonte kryetari i Parlamentit, si pjesë e ceremonisë inauguruese të presidentit të shtetit.
Mospërmendja e emrit kushtetues nga presidentja e sapozgjedhur është në kundërshtim me Marrëveshjen e Prespës, e cila u nënshkrua me Greqinë në vitin 2018, me të cilën u hoq vetoja greke për anëtarësim të Maqedonisë së Veriut’ në NATO dhe për integrim në BE.
Ndryshe, për herë të parë që nga pavarësimi në vitet ‘90, Maqedonia e Veriut zgjodhi një grua për presidente të shtetit.
Profesoresha universitare, Gordana Silanovska-Davkova, e cila mbështetet nga partia e djathtë opozitare, VMRO-DPMNE, e fitoi balotazhin presidencial më 8 maj, kundër kandidatit të Lidhjes Social-Demokrate, Stevo Pendarovski, deri më tash president.
Në fjalimin e parë para opinionit, pas fitores, Silanovska-Davkova tha se do të jetë presidente e të gjithë qytetarëve, pavarësisht përkatësisë etnike apo partiake.
“Nga ky moment do të sillem si presidente e të gjithë qytetarëve, të gjitha grupeve etnike, të gjithë anëtarëve partiakë, atyre që nuk janë në parti… sepse presidentja nuk mund ta bashkojë popullin dhe të kërkojë unitet nëse mban vija partiake”, tha ajo.
Fqinjëve u bëri thirrje që ta mbështesin, siç tha, ballkanizimin, ta ndihmojnë njëri-tjetrin dhe të jenë politikanë të vërtetë.
“Duhet të fillojmë ta kuptojmë njëri-tjetrin, ta ndihmojmë njëri-tjetrin, të mos kërkojmë veto, por të kërkojmë mbështetje. Rrugët e mia së pari çojnë në Ballkan, dhe, natyrisht, as Brukseli nuk është jashtë”, tha Silanovska-Davkova./KDP