E enjte, 25 Korrik, 2024

SOT DORËHIQET KOVAÇEVSKI, MICKOSKI SHPALOS EMRAT

Pançe Toshkovski, avokat dhe kryetar i Komisionit për Çështje Juridike në VMRO – DPMNE, është propozimi i partisë më të madhe opozitare për Ministër të Punëve të Brendshme në Qeverinë teknike. Kryetari i partisë, Hristijan Mickoski, në emisionin “Top Tema” televisionit Telma ka bërë të ditur emrat e propozimeve për anëtarë të Qeverisë që duhet të zgjidhen të dielën më 28 janar, raporton Zëri i Amerikës, përcjell KDP.

Toshkovski ka qenë anëtar i KQ të partisë, ka punuar edhe në Ministrinë e Transportit dhe Lidhjeve, ndërsa është punësuar si avokat në ESM në kohën kur Mickoski drejtonte kompaninë shtetërore.

Gjoko Velkovski do të drejtojë Ministrinë e Punës dhe Politikës Sociale. Aktualisht punon si shef i Departamentit për mbështetjen e kryetarit të Komunës Gazi Babë dhe këshilltar në Këshillin e Komunës.

“Ai e njeh mirë punën dhe strukturën, dikur ka qenë sekretar i Qytetit të Shkupit, tani është pjesë e komunës së Gazi Babës. Vlerësoj që si një profesionist shumëvjeçar mund të japë vlerë të shtuar në këto 100 ditë për të siguruar që ne të kemi një menaxhim të mirë të ministrisë dhe për të ndikuar në parandalimin e ryshfetit që ju e dini para shpalljes së festave të Vitit të Ri nga qeveria“, tha Mickoski.

Zëvendësministre plotësuese e Financave do të jetë Elena Petrova, e cila vjen nga Drejtoria e të Ardhurave Publike (DAP), ku ka punuar 25 vjet. Sipas Mitsoskit, bëhet fjalë për një profesioniste e cili do të kontribuojë për një “ekip konkurrues të shëndoshë” në ministri.

Në Ministrinë e Bujqësisë, siç pritej, propozim për zëvendësministër shtesë është Cvetan Tripunovski, i cili punon në këtë ministri dhe në qeverinë e kaluar teknike ka kryer të njëjtin funksion dhe ka udhëhequr komisionin partiak për bujqësi.

Propozimi i fundit është Stefan Andonovski për zëvendësministër shtesë në Ministrinë e Shoqërisë Informative dhe Administratës. Andonovski aktualisht është sekretar ndërkombëtar i partisë dhe ka mbajtur pozitën e sekretarit të përgjithshëm të Qytetit të Shkupit para se VMRO-DPMNE dhe kryetarja Danela Arsovska të ndërpresin bashkëpunimin dhe mbështetjen.

“Për shumë vite, pjesë e UMS-së, pjesë e KI-së, bashkëpunëtor i ngushtë, kemi plane të mëdha në dixhitalizimin e Maqedonisë menjëherë pas zgjedhjeve si qeveri e ardhshme. Vlerësoj se edhe ai do të jetë ndryshimi që do ta shohin qytetarët në këto 100 ditë”, tha Mickoski.

Mickoski konfirmoi qëndrimin se deputetët e partisë së tij nuk do të mbështesin zgjedhjen e Talat Xhaferit për kryeministër të Qeverisë teknike.

“Ne nuk do të jemi si LSDM-ja, do të jemi në bankat parlamentare dhe do të abstenojmë nga votimi. Nuk do ta votojmë sepse vlerësojmë që Talat Xhaferi nuk e meriton të votohet. Në mandatin e dytë si kryetar parlamenti ai shkeli Rregulloren, Kushtetutën, ligjet etj. Ne e vlerësojmë që ai person nuk mund të jetë një person që mund të sigurojë një proces në të cilin ne të gjithë do të jemi krenarë. Por ky është rezultati, fryt i një marrëveshjeje politike që kishin LSDM dhe BDI. Po të isha mandatar, nuk do të pranoja që një personazh i tillë të ishte pjesë e kabinetit tim”, tha Mickoski.

Kryeministri Dimitar Kovaçevski sot do të dorëzojë dorëheqje, që do të thotë se në dorëheqje do të jetë edhe i gjithë kabineti qeveritar, të njëjtën do ta bëjë edhe kryeparlamentari Talat Xhaferi. Kjo i hap rrugën zgjedhjes së Qeverisë së re teknike, e cila do të ketë një periudhë prej 100 ditësh dhe do të duhet të organizojë zgjedhjet e planifikuara të rregullta presidenciale dhe parlamentare që duhet të mbahen më 24 prill, gjegjësisht 8 maj.

Të premten në seancën e Kuvendit do të konfirmohen dorëheqjet e Kovaçevskit dhe Xhaferit, ndërsa kryetar i ri i Kuvendit do të zgjidhet Jovan Mitreski, koordinator i Grupit Parlamentar të LSDM-së.

Presidenti Stevo Pendarovski të premten zyrtarisht do t’ia ndajë mandatin e kryeministrit qeverisë teknike të Talat Xhaferit.

Të shtunën, më 27 janar, Xhaferi duhet të dorëzojë në Kuvend programin dhe përbërjen e Qeverisë, ndërsa të dielën më 28 janar do të mbahet seanca për zgjedhjen e qeverisë teknike të udhëhequr nga Xhaferi dhe me propozime të opozitës.

Të fundit