Javën e kaluar, Këshilli i Bashkëpunimit Rajonal(RCC) publikoi rezultatet e Barometrit Ballkanik 2023, Opnioni i Publikut. Për ta plotësuar pasqyrën e opinioneve në Ballkanin Perëndimor kur është fjala për bashkëpunimin rajonal, integrimin në BE, besimin në institucionet publike dhe mediat, shqetësimet e tyre më të mëdha, punësimin, ndryshimet klimatike, sigurinë, jetën digjitale, transportin, sundimin e ligjit, udhëtimet, etj, tani është i disponueshëm edhe Opinioni i Komunitetit të Biznesit të Ballkanit Perëndimor https://www.rcc.int/balkanbarometer/, – transmeton kdp.mk njoftimin e RCC-së me bazë në Sarajevë .
“Kur u pyetën për të vlerësuar faktorët që ndikojnë në rritjen e biznesit të tyre, biznesmenët e Ballkanit Perëndimor vendosën në krye të listës paqëndrueshmërinë makroekonomike, të ndjekur nga disponueshmëria e punës, ikja e trurit si dhe paqëndrueshmëria politike ose sociale. Mbështetja nga bizneset për anëtarësimin në BE është rritur me 11% dhe tani është në 71%, duke arritur nivelin më të lartë historik që nga fillimi i Barometrit Ballkanik, në 2015. Mbështetja për bashkëpunimin rajonal midis biznesmenëve është rritur nga 69%, që ishte vitin e kaluar, në 74% këtë vit, pasi përceptohet si i rëndësishëm për biznesin e tyre”,- tha Sekretarja e Përgjithshme e RCC-së, Majlinda Bregu.
Pesë rezultatet kryesore të Barometrit Ballkanik 2023, Opinioni i Biznesit:
– Bizneset e Ballkanit Perëndimor e shohin situatën paksa më të favorshme se një vit më parë, pasi indeksi i kënaqësisë së tyre u rrit me 5 pikë duke arritur në 58;
– Megjithatë, 77% thonë se kostot e tyre të punës dhe të tjera janë rritur me më shumë se 25% gjatë katër viteve të fundit;
– Vetëm një e treta (33%) e bizneseve në rajon presin një përmirësim të situatës së tyre ekonomike në vitin e ardhshëm;
– Vetëm 13% përdorin kryesisht energji të rinovueshme dhe 37% nuk kanë ndërmarrë asnjë hap për të reduktuar ndikimin mjedisor të bizneseve të tyre;
– Shumica e tyre (56%) presin përfitime të mëdha nga udhëtimi vetëm me një kartë identiteti brenda rajonit;
“- Alarmi i kuq është se 70% e bizneseve nuk i shohin ndryshimet klimatike si një shqetësim domethënës për mjedisin e tyre të biznesit. Po, në Ballkan, kjo mund të mos tingëllojë ende si një emergjencë, dhe ndryshe nga një sëmundje, nuk është drejtpërdrejt e përceptueshme për shqisat tona. Por, kjo është mjaft alarmante. Nga ndotja, rritja e kostove të sigurimit, bujqësia, vera, energjia, transporti i mallrave deri te disponueshmëria e zvogëluar e ushqimit dhe ujit, të gjitha ndikohen nga ndryshimet klimatike. Pothuajse të gjitha industritë janë të kërcënuara nga efektet e ndryshimeve klimatike, direkt ose indirekt. Mirëpo, ka edhe lajme të mira. Gjysma e bizneseve rajonale thanë se kanë përjetuar përfitime të drejtpërdrejta nga Marrëveshja Rajonale e Roaming-ut. Këto gjetje mund të mos i pëlqejnë të gjithëve. Por sido që të jetë Ballkani, ai nuk është kurrë i njëtrajtshëm, por një rajon plot ngjyra”, përfundoi Bregu./kdp.mk/