E enjte, 25 Prill, 2024

UN WOMEN DHE RCC BASHKOJNË FORCAT PËR TË AVANCUAR EDHE MË TEJ ME FUQIZIMIN E GRAVE NË BALLKANIN PERËNDIMOR

Përgatiti: Lorik Idrizi

Zyra Rajonale e UN Women për Europën dhe Azinë Qendrore (ECA) dhe Këshilli i Bashkëpunimit Rajonal (RCC) do të bashkojnë forcat për të çuar përpara transformimin digjital në Ballkanin Perëndimor, për të promovuar bashkëpunimin në rajon, si dhe për të avancuar fuqizimin ekonomik të grave dhe agjendën e gjelbër.

 Të dy entitetet do të bashkëpunojnë për të çuar edhe më tej misionin dhe vizionin e përbashkët për shkrirjen e ndasive gjinore në fushën digjitale  e për të mbështetur sipërmarrjen e grave, duke përfshirë krijimin e një ekosistemi që ushqen kapitalin e grave dhe vajzave në arsim, trajnim dhe karrierën STEM.

Drejtoresha Rajonale e UN Women për Europën dhe Azinë Qendrore, Alia El-Yassir, tha: “Revolucioni digjital ka potencial transformues për gratë dhe vajzat. Po ofrohet një mbështetje e fortë nga partnerët në të gjithë Ballkanin Perëndimor në këtë drejtim, por hendeku gjinor në fushën digjitale mbetet ende i madh. Duke bashkëpunuar me RCC, ne bashkojmë forcat tona për të zgjeruar mundësitë digjitale për gratë dhe vajzat në rajon, për të përmirësuar rezultatet sociale dhe ekonomike për to, duke siguruar që ato të mund të gëzojnë hapësira të sigurta në internet.”

 

“Rajoni do të kishte një GDP më të lartë me 5.0 %, mesatarisht, nëse pjesëmarrja e grave si sipërmarrëse do të ishte e barabartë me atë të burrave. Megjithatë, numri mesatar i grave pronare në bizneset e tyre në rajon është vetëm 27.5%. Në Ballkanin Perëndimor gratë fitojnë  16% më pak se burrat. Është e qartë se potenciali i grave duhet të fuqizohet dhe për t’u arritur kjo, bashkëpunimi rajonal mund të jetë katalizatori i duhur, veçanërisht në fushat e ndërlidhjes, transformimit digjital dhe agjendës së gjelbër. Prandaj fuqizimi i grave është i përfshirë në çdo gjë që RCC bën. Është e ndërthurur fort me misionin dhe vizionin tone”, tha Sekretarja e Përgjithshme e Këshillit të Bashkëpunimit Rajonal, Majlinda Bregu.

Si pjesë e këtij partneriteti, UN Women dhe RCC do të bashkëpunojnë në nismat rajonale për të rritur më tej fuqizimin ekonomik të grave, duke përfshirë Agjendën Digjitale për Ballkanin Perëndimor (DAWB), si dhe Agjendën e Gjelbër për Ballkanin Perëndimor (GAWB).

Reth RCC

Këshilli i Bashkëpunimit Rajonal (RCC) është një organizatë gjithëpërfshirëse që drejtohet nga vendet e rajonit. Angazhon pjesëmarrës të RCC nga Evropa Juglindore, anëtarë të bashkësisë ndërkombëtare dhe donatorë për tema të rëndësishme dhe me interes për Europën Juglindore, me synimin për të promovuar dhe avancuar integrimin europian dhe euroatlantik të rajonit.

Të fundit