Shtetet e Bashkuara të Amerikës (SHBA) i kanë shpallur “luftë” personave të korruptuar në Maqedoninë e Veriut, raporton KDPOLITIK.COM.
Lajmin e bëri të ditur ambasadorja amerikane në Shkup, Angela Ageler, e cila me një postim në Twitter njoftoi se ekipi i posaçëm nga Washingtoni tashmë ka zbarkuar në Maqedoninë e Veriut.
“Ekipi i Sanksioneve nga Uashingtoni vjen këtu për të marrë një vështrim më agresiv ndaj aktorëve të korruptuar, të kaluar dhe aktual, dhe për të marrë në konsideratë të gjitha përgjigjet e mundshme. Sektori i drejtësisë i Maqedonisë së Veriut ka nevojë për më shumë hetime, ndjekje penale për të treguar se askush nuk është mbi ligjin”, ka shkruar Agelel.
Sanctions Team from Washington here to take a more aggressive look at past and current corrupt actors, and to consider all possible responses. North Macedonia’s justice sector needs more investigations, prosecutions to show that no one is above the law.
— Ambassador Angela Aggeler (@USAmbNMacedonia) December 6, 2022
Lufta kundër korrupsionit në botë dhe forcimi i demokracisë kanë qenë dy shtyllat e doktrinës së presidentit Joe Biden që nga zgjedhja e tij në vitin 2021. Nëpërmjet luftimit të korrupsionit dhe forcimit të shtetit të së drejtës SHBA tenton të luftojë ndikimet keqdashëse dhe të forcojë shtetet me demokraci të brishtë.
Të njëjtin prioritet e paraqiti edhe ambasadorja Ageler që nga emërimi i saj në misionin diplomatik në Shkup. Ajo e njeh mirë realitetin politik dhe shoqëror në vend pasi edhe më parë ka qëndruar në mision diplomatik në Maqedoninë e Veriut.