Shembja ka nisur të kryhet nga pjesa ballore e Teatrit Eksperimental, ndërsa më pas është shembur edhe godina e Teatrit Kombëtar.

U NDËRTUA NGA ITALIANËT NË VITIN 1938

Pronësia e terrenit iu ble familjes Libohova për interes publik. Sipas historianëve, në vitin 1938, Francesco Jacomoni firmos blerjen e një trualli rreth 10 mijë metra katrorë nga familja Libohova për rreth 75 mijë franga ari, afërsisht katër fish i vlerës që vlerësohet sot nga qeveria shqiptare. Pasi e bleu ai, ia dhuroi popullit shqiptar me vetëm një kusht, prona t’i shërbejë të gjithë shqiptarëve për edukim, kulturë, shplodhje dhe rekreacion.

Toka e Teatrit Kombëtar, pronë e familjes Libohova 80 vite më parë, i është shitur në vitin 1938 Mbretërisë Italiane për 74.377 franga floriri. Kjo është kontrata që djemtë e Servet bej Libohovës kanë lidhur me përfaqësuesin e Mbretërisë së Italisë Francesco Jacomoni, për të noterizuar aktin e shitjes së truallit prej 10.625 metra katrorë dhe shtepisë së tyre mbi këtë truall, me një vlerë prej 7 franga floriri për metër katror. Kjo pronë ishte destinuar për ndërtimin e kompleksit të ndërtesave të projektuara nga arkitekti i famshëm italian Giulio Berté, i cili më vonë do të shndërrohej në Teatrin Kombëtar të Shqipërisë. 

Ndërtesa e teatrit është e vetmja godinë futuriste e inxhinierit dhe arkitektit italian, Giulio Berté, projekti i nisur në fillimjanarin e 1938 dhe që përfundoi në shtator të 1939. U porosit nga Mbretëria Shqiptare në bazë të marrëveshjes italo-shqiptare të janarit të 1938, në hulli të planit rregullues të qendrës së Tiranës. Aty u vendos rrethi italo-shqiptar “Scanderbeg”, si qendër kulturore, artistike, sportive dhe argëtuese, e ndërtuar nga firma “Pater”. Sipërfaqja tokës së dhënë për projektin përfshinte 13 mijë m2, prej të cilave 7 mijë m2 mbulohen nga godina brenda së cilës ishte biblioteka, zyra e informacionit, zyra e përkthimit letrar, etj.

Funksionet kulturore dhe sportive godina vazhdoi t’i ushtronte edhe pas pushtimit italian. Pas kapitullimit italian, ndërtesa ndërroi emër dhe u quajt Kinema “Kosova”. Më 1945 iu bë edhe ndryshimi i fundit, duke u shndërruar në Teatër Popullor, më pas Kombëtar.

Aktorët të parë të Teatrit Profesionist ishin Mihal Popi, Gjon Karma, Mihal Stefa, Ndrek Shkjezi, Liza Vorfi, Behije Çela, Ndoc Meshkalla, Hasan Reçi. Me vonë erdhën nga lëvizja amatore emra shumë të njohur si Marie Logoreci, Prokop Mima, Sandër Prosi, Sulejman Pitarka, Pjetër Gjoka, Loro Kovaçi, Besa Imami, Violeta Manushi si dhe regjisori i porsadiplomuar Pandi Stillu.

REAGOJNË META DHE BASHA, PËRGJIGJET RAMA